Susto por mor dun incendio nun taller de chapa e pintura da Coruña

O lume afectou unha superficie duns cinco metros cadrados, porén o fume propagouse por todo o local e mesmo chegou a invadir varias vivendas.

Unha veciña foi quen viu esa densa fumareda desde o patio de luces e, canda o seu marido, actuaron sen perder un minuto.

O taller xa estaba pechado. Porén un dos traballadores que vive no primeiro andar tiña a chave, e así accederon ao interior.

Entrementres, outros veciños alertaban os bombeiros, a Policía Local e a Nacional, e tamén o 061, que tivo que atender no mesmo lugar dos feitos unha veciña por unha posible inhalación de fume.

Esta mañá o taller xa funcionaba con aparente normalidade.