Stellantis presenta en Vigo a súa nova unidade de vehículos comerciais

Stellantis escolleu Vigo, onde se sitúa a maior fábrica de vehículos comerciais do grupo Stellantis, para presentar este mércores en España a unidade de negocio de vehículos comerciais do grupo, coa que aspira a ser líder mundial do segmento en 2027, que implicará a renovación de toda a gama á vez, unha "ofensiva xamais vista".

Alberto de Aza, CEO de Stellantis Prol One Iberia, capitaneou o primeiro evento de Prol One en España e anunciou que por primeira vez renovan toda a gama de comerciais, doce modelos, á vez e avanzou que "se verá o mes que vén". Asegurou: "Algo como o que imos vivir este ano non se viu nunca no mercado", menos no mundo do vehículo industrial.

Liderar a produción de vehículos comerciais en 2027

En 2023,  Stellantis vendeu 578.000 unidades de vehículos comerciais en Europa e no mercado español, o grupo encabeza as matriculacións cun 35,2 % de cota, que se converte nun 48,9 % de penetración no caso dos comerciais 100 % eléctricos. "O obxectivo é sermos líderes claros no mercado mundial, europeo e español de eléctricos comerciais", asegurou De Aza.  O CEO de Stellntis Prol One Iberia salientou ademais que teñen "boas perspectivas" para 2024 e apuntou que Prol One xoga "un papel fundamental" na estratexia de Stellantis Dare Forward 2030, tanto no plano comercial como no resultado económico.

Redución das emisións de CO₂

Con este novo plan estratéxico, a compañía tamén ten o  compromiso de reducir o CO₂ como paso intermedio do obxectivo de chegar ás cero emisións de carbono en 2038.  Unha estratexia con que pretenden ser líderes en vehículos comerciais en 2027 no mundo conforme a unha mobilidade limpa, segura e accesible. 

A nova xeración de vehículos comerciais de Stellantis Prol One ofrecerá capacidades dirixidas a optimizar a xestión de frotas, unha área de negocio emerxente, xa que o Grupo prevé ingresar cinco billóns de euros por este tipo de servizo en 2030.