Sindicatos da educación concertada convocan folga o 9 de setembro, primeiro día do curso

Os sindicatos da educación concertada en Galicia convocaron unha xornada de folga para o próximo día 9 de setembro, primeiro día lectivo do curso escolar 2026-2027 ante o que cualifican de "nula vontade" da Consellería de Educación para establecer un calendario de negociacións.

O obxectivo, conforme apuntan nun comunicado conxunto --asinado por FSIE, UXT, CCOO Ensino, USO, SNEP e CIG--, é desbloquear tanto os acordos de mellora das condicións laborais como o abono da paga extraordinaria de antigüidade ou os complementos de cargo de hai máis de 17 anos, "algúns deles mesmo estando asinados e publicados no Diario Oficia de Galicia".

Os sindicatos sinalan que o persoal traballador da concertada representa un terzo da educación en Galicia, ao redor de 7.000 profesionais que atenden o 30% do alumnado galego das etapas non universitaria.

"A nosa preocupación prol a situación que atravesa este persoal é cada vez máis profunda. Só se conta con el para incrementar a burocracia e as obrigacións, mentres que as melloras das súas condicións continúan estancadas e moi lonxe das existentes noutros ámbitos educativos", indicou.

Ademais, o vindeiro mércores 9 esta xornada de folga estará acompañada de concentracións ás 10:00 horas ante as delegacións da Consellería de Educación nas cidades da Coruña, Lugo, Ourense, Santiago e Vigo.

Así as cousas, convocan os medios a unha conferencia de prensa para o vindeiro luns, día 7 de setembro, ás 11:00 horas, no local sindical da UXT en Santiago.