Seis equipos loitarán por dúas prazas europeas nas catro últimas xornadas

Comeza o último mes de competición, o esprinte final no campionato de Liga. Barcelona e Real Madrid loitan polo título. Vilarreal e Betis por un posto en Liga de Campións. Leganés, As Palmas, Alavés ou Xirona por evitar o descenso. E a pelexa na que está inmerso o Celta é a de entrar en Europa. 

Son oito os equipos que representarán a Liga Española nas competicións continentais a vindeira campaña. O Celta ocupa o sétimo posto malia a derrota no Bernabeu (3-2) e parte con vantaxe nestas catro últimas xornadas. Ten dous puntos máis que o Raio, o Osasuna e o Mallorca e sácalle 3 a unha Real Sociedade que recibirá o conxunto vigués nun deses encontros. O último equipo con posibilidades é o Valencia con 42 puntos e unha gran reacción nas últimas xornadas. 

Ademais do partido da Real Sociedade, o Celta terá outro duelo directo. Xogará en Balaídos contra o Raio Vallecano na xornada 37. Sevilla e Xetafe, os dous en terra de ninguén, son os outros dous rivais que vai ter o cadro de Giráldez. 

Por ese duelo directo e polo seu gran cadro de xogadores a Real Sociedade podería ser o rival máis perigoso, pero ten dous partidos -Real Madrid e Atlético de Madrid como visitante- que dificultan moito a suma dunha gran cantidade de puntos. Non queda nada para o final, tendo en conta que hai unha xornada entre semana (o Celta xoga o martes, 13 de maio) e o obxectivo está moi preto. A primeira cita para o equipo galego será diante do Sevilla, este sábado ás 16:15 horas que se poderá ver na Televisión de Galicia.