Biden prepara o terreo para a reelección cun discurso dirixido á alma do país
O presidente dos Estados Unidos estivo moi centrado na política social e pediu consenso
No eido internacional, lanzoulle unha advertencia á China e prometeu apoio a Ucraína
Grande ovación aos pais de Tyre Nichols, o mozo de Memphis que morreu no hospital despois dunha brutal malleira da policía. O falecemento de seu fillo renovou os chamamentos a unha reforma policial estancada no Congreso.
Aplauso tamén ao mozo que desarmou un home durante un tiroteo masivo en California.
"Prohiban as armas de asalto agora", di Joe Biden.
O presidente dos Estados Unidos terá difícil sacar adiante esta proposta nunha cámara profundamente dividida. De feito, no seu segundo discurso do Estado da Unión chamou a facer un esforzo bipartidista e ofreceulles aos republicanos traballaren xuntos.
A economía e a sanidade foron dous dos eixos da súa intervención. E dos momentos que xeraron máis reacción nas bancadas.
Apupos ao dicir que hai republicanos que queren que o Medicare e a Seguridade Social decaia. Entusiasmo demócrata ao prometer vetar calquera intento de prohibir o aborto.
Política internacional
Reforma migratoria, plan de infraestruturas, loita contra a inflación... a pesar de estar centrado nas cuestións internas do país, o presidente tamén lle deu espazo á política internacional.
Incidiu no apoio a Ucraína, o tempo que sexa necesario, e mandou un aviso á China, proclamando a defensa da soberanía nacional de ser ameazada.
Joe Biden pechou o seu discurso facendo un chamamento á defensa da democracia e proclamando a fortaleza do Estado da Unión.
