Santos Cerdán dimite como secretario de Organización do PSOE e entregará a acta de deputado
Con todo, Cerdán insiste na súa inocencia: "Xamais cometín unha ilegalidade", indicou nun comunicado
Cerdán, nunha imaxe de arquivo durante a súa comparecencia na comisión do caso Koldo
O secretario de Organización do PSOE, Santos Cerdán, presentou a súa dimisión e anunciou que deixará tamén a súa acta de deputado tras o informe da UCO da Garda Civil que o relaciona coa cobranza de comisións ilegais.
Con todo, Cerdán insiste na súa inocencia, "xamais cometín unha ilegalidade", indicou nun comunicado emitido este xoves no que non aparece o membrete do PSOE.
"Ser secretario de Organización do PSOE foi o maior privilexio de toda a miña vida. É unha honra que me acompañará sempre. Iso, e axudar a conformar un Goberno progresista que levou a España a vivir as súas maiores cotas de crecemento, emprego e dereitos. E todo iso a pesar das adversidades, que foron moitas", afirma.
"Precisamente por iso, en defensa deste partido ao que tanto debe este país, e deste Goberno, decidín presentar a dimisión de todos os meus cargos. Tamén farei entrega da miña acta de deputado", engade.
Cerdán remata o comunicado asegurando que "son tempos complicados, pero o PSOE é máis necesario que nunca. E eu sempre farei o que sexa mellor para o meu partido, e para o meu país. Reitero a miña inocencia e confío que a mesma quede clara tras a miña declaración".
