Sánchez pide a suspensión do acordo UE-Israel e que non haxa unha nova Gaza no Líbano

O presidente do Goberno, Pedro Sánchez, instou as institucións da UE a suspender o acordo de asociación con Israel.

"Non permitamos unha nova Gaza no Líbano, porque, ante violacións flagrantes do dereito internacional humanitario, Europa ten que actuar con coherencia", dixo.

No European Pulse Forum 2026, organizado por Politico e beBartlet no CosmoCaixa de Barcelona, Sánchez defendeu esta suspensión "por coherencia e tamén por empatía" e para que a posición mantida pola Unión en Ucraína sexa apoiada polo resto do mundo.

"España, por suposto, está preparada para dar ese paso xunto con outros moitos países europeos", asegurou, e engadiu que Israel está atropelando e violando moitos dos artigos do acordo de asociación entre Europa e Israel.

Críticas de Netanyahu a España e defensa da UE por parte de Sánchez 

Este venres o primeiro ministro de Israel, Benjamin Netanyahu, acusou o Goberno español de librar unha "guerra diplomática", que asegura que non tolerará, palabras ás que o presidente do Executivo non respondeu de forma directa.

Mentres, Sánchez fixo unha defensa da UE e da súa aposta por unha orde global baseada en regras, pero lembrou que debe ser firme en defender o dereito internacional.

"Non podemos quedar soamente co queixume, a frustración. Basta con mirar a Gaza para ver cales son as consecuencias desta violación que se está facendo do dereito internacional", engadiu o presidente español.

Segundo Sánchez, moitos países do sur global están pendentes da posición que tome Europa, e os europeos non deben renunciar a ser un faro para o mundo, senón avanzar nesta dirección. "Non necesitamos unanimidade para avanzar; necesitamos vontade, vontade política", dixo en referencia ao sistema de decisión da UE.

Defendeu que, nun momento de retroceso na solidariedade global, os líderes de Europa deben facer o que "esperan e desexan os seus cidadáns": involucrarse ante os desafíos globais da humanidade e rearmarse moralmente.

"Europa non soamente é rearmarse para facer fronte aos seus problemas de seguridade e de defensa, senón tamén rearmarse no moral para poder contribuír ao desenvolvemento estable e de paz no conxunto do mundo", sostivo Sánchez.

Ademáis contrapuxo a posición de repregamento que ve nalgúns países respecto ao mundo coa que debe tomar Europa: "Non hai que caer na tentación de pensar que, nun mundo cada vez máis tensionado, a solución é repregarse".

Pedro Sánchez rexeita mirar para outro lado

Rexeitou mirar para outro lado ante as violacións do dereito internacional e ante o uso do comercio como "armas contra supostos socios", porque sería asumir o marco de debate e as formas das forzas reaccionarias.

Lamenta o presidente español que estas forzas aseguren que Europa está quedando atrás e engadiu que a UE "é confianza é estabilidade para co resto do mundo" e tamén apertura ao comercio, ao talento e á "migración legal, segura e ordenada".