Sánchez di que actuaron con contundencia con Cerdán e que agora é o momento da xustiza

O presidente do Goberno, Pedro Sánchez, subliñou que o partido actuou con "contundencia" co exsecretario de Organización socialista Santos Cerdán, para quen o xuíz decretou prisión este luns polo caso Koldo, e agora, dixo, é a xustiza a que ten que dirimir as súas responsabilidades.

Sánchez referiuse á situación do que fora o seu número 3 no partido nunha conferencia de prensa no marco da IV Conferencia Internacional sobre Financiamento para o Desenvolvemento, que se inaugurou este luns no Palacio de Exposicións e Congresos (Fibes).

Insistiu en que o PSOE actuou "de maneira contundente" desde o primeiro momento, asumíronse responsabilidade políticas, apartouse a Cerdán do partido e agora é á xustiza, recalcou, á que lle toca dirimir "exactamente cales son as responsabilidades no caso de Cerdán".

Sánchez trasladou "a máxima colaboración coa xustiza" e o respecto ao seu labor, subliñando que desde o punto de vista político a posición do PSOE é "moi distinta" a outros partidos, que "non asumen ningún tipo de responsabilidade", en referencia ao PP.

Pola súa banda, fontes do Goberno recoñecen que o feito de que o xuíz decretase a prisión sen fianza non foi unha sorpresa e aseguraron que esa circunstancia, dentro da gravidade, non cambia nada e non afecta o Executivo. Por iso non teñen comentarios que facer á declaración do exsecretario de Organización do PSOE, aínda que non comparten o seu argumento de que se trate dunha cacería contra el.

Si insisten en resaltar a diferenza de reacción do PSOE e do PP ante este tipo de casos, xa que subliñaron que os socialistas actúan con contundencia, como dixo Sánchez, desde o primeiro momento. Unha reflexión que rexeitan que supoña entrar no xogo do "e ti máis", senón que estiman que é lexítimo comparar reaccións.

Reiteran as fontes citadas que a situación non ten por que implicar unha crise de Goberno e que o que vai haber son cambios no partido e medidas para aumentar os controis que Sánchez vai anunciar no Comité Federal do PSOE do próximo sábado.

Algunhas voces discrepantes do PSOE reclaman máis autocrítica por parte do seu secretario xeral. Emiliano García-Page, presidente de Castela-A Mancha, cre que algúns "quérense facer pasar por vítimas de Santos Cerdán ou de Ábalos". Pero, na súa opinión, só poden facelo "os que non tiveron nada que ver co seu nomeamento" e "nunca os que foron determinantes na súa traxectoria política".

Podemos tamén cre que Sánchez é responsable neste caso, por ser el quen nomeou os seus dous secretarios de Organización agora imputados. Para Pablo Fernández, voceiro dos morados, "é lamentable que Santos Cerdán dea antes explicacións ante o xuíz que Pedro Sánchez ante o Congreso dos Deputados".

Os Comúns, a rama catalá de Sumar, vaise presentar como acusación popular no caso. A coordinadora de Sumar, Lara Hernández, considera que se ten que producir "unha clarísima depuración de responsabilidades no ámbito político e, por suposto, no ámbito xudicial tamén se as houbese".

Para o Partido Popular, é o "sanchismo" o que hoxe está en prisión sen fianza. Segundo a súa secretaria xeral, Cuca Gamarra, "Pedro Sánchez é e foi presidente grazas a Cerdán, e Cerdán fixo todo o que fixo grazas a Pedro Sánchez". Por iso, conclúe a popular, "se un cae xudicialmente, o outro debe caer politicamente".