Rueda lamenta que o Goberno non convoque as CC. AA. para falar de financiamento autonómico
O presidente da Xunta, en materia de orzamentos, contrapón a situación de Galicia á do Estado: "Nós estamos na fase final; eles empezan"
Alfonso Rueda acusa o presidente do Goberno de "acordarse" da comunidade só para "tentar facer dano": "Non dixo unha verdade sobre Galicia"
Alfonso Rueda atende os medios de comunicación este xoves en Santiago de Compostela
O presidente da Xunta, Alfonso Rueda, critica que na orde do día do Consello de Política Fiscal e Financeira que se celebrará o vindeiro luns non estea a reforma do sistema de financiamento autonómico.
O Goberno convoca as comunidades a unha reunión para acordar a senda de estabilidade, paso previo á presentación das contas xerais do Estado, o mesmo día que arranca no Parlamento de Galicia o debate dos presupostos da Xunta para o 2026.
Será o Secretario xeral técnico da consellería de Facenda e Administración Pública, David Cabañó, o encargado de representar a Galicia no Consello de Política Fiscal e Financeira, porque o conselleiro Miguel Corgos estará a esa hora defendendo os presupostos da Xunta no Parlamento.
Alfonso Rueda contrapón a situación de Galicia á do Estado.
"Nós estama na fase final; eles empezan. E non se van reunir para o que de verdade interesa, que levamos anos pedindo, que é o financiamento autonómico".
A preguntas dos xornalistas nun acto que se celebrou este xoves en Santiago, o presidente da Xunta respondeu ás críticas de Pedro Sánchez aos servizos públicos galegos na súa comparecencia no Congreso. Alfonso Rueda acusa o presidente do Goberno de usar Galicia para desviar a atención dos seus problemas.
"A Xunta ten que poñer cantidades a maiores porque o Goberno de Sánchez cada vez lle debe máis a Galicia en dependencia. Este é só un exemplo dos que poderiamos poñer. Non dixo unha verdade sobre Galicia e lamento moitísimo que nos use para intentar facer dano e non para intentar solucionar problemas", afirmou Rueda.
