Rubén Colmenero deixa a alcaldía de Vilar de Santos tras oito meses no cargo
O rexedor, do BNG, presentou a súa dimisión por motivos "persoais e urxentes" incompatibles coa dirección do Concello
Asegura que marcha "cun profundo agradecemento" e coa emoción de saber que fixo todo o posible por mellorar o seu concello e servir os veciños"
A portavoz nacional do BNG, Ana Pontón, co alcalde de Vilar de Santos, Rubén Colmenero (Arquivo)
O ata o de agora alcalde da localidade ourensá de Vilar de Santos, Rubén Colmenero, presentou a súa dimisión por motivos "persoais e urxentes" incompatibles coa dirección do Concello tras oito meses no cargo, despois de substituír en febreiro a Antonio Míguez.
Segundo trasladou o BNG local, Colmenero sinalou que esta decisión responde a un cambio de etapa "persoal e vital" e destacou que deixa o cargo "cun profundo agradecemento e coa emoción de quen se marcha sabendo que fixo todo o posible por mellorar o seu concello e servir aos veciños".
Así mesmo, o equipo de goberno de Vilar de Santos -formado por seis edís nacionalistas- tamén expresou o seu respecto pola decisión do rexedor, ao que lle desexaron "éxitos" nos seguintes pasos da súa traxectoria.
Tamén o BNG trasladou o agradecemento de toda a militancia por "o traballo e o compromiso" de Rubén Colmenero por "a súa dedicación e entrega" ao consistorio local.
O obxectivo do Bloque, destacou a formación, "segue sendo o mesmo": "Traballar con responsabilidade e proximidade pola mellora da calidade de vida dos veciños de Vilar de Santos e polo avance do noso concello".
