A ministra de Defensa, Margarita Robles, asegurou este luns que o ataque israelí a militares españois integrados na misión de Nacións Unidas no Líbano demostra que o alto o fogo está "collido absolutamente con pinzas".
O ataque produciuse ás seis da mañá do domingo, cando un tanque israelí disparou mentres realizaba unha "misión de recoñecemento dentro do ámbito do seu territorio".
O suceso rematou sen feridos, pero Nacións Unidas xa expresou a súa queixa
"Houbo un ataque, os nosos soldados protexéronse, e están todos ben porque non queremos tampouco intranquilizar as familias, pero nós transmitimos a queixa. Nacións Unidas, inmediatamente, fixo un comunicado de protesta cualificándoo de inaceptable e Israel sacou un comunicado tratando de dicir, dalgunha maneira, que fora un erro e que abriría unha investigación", explicou.
Iso demostra —indicou— que o alto o fogo en Oriente Medio está collido "absolutamente con pinzas".
Interpelada sobre a situación xeopolítica actual coas guerras de Ucraína e Gaza, Robles recoñeceu que, hoxe en día, o mundo "non está ben", xa que a guerra de Ucraína segue "dun xeito moi cruel, moi atroz e cuns medios moito máis sofisticados".
"Hai un par de anos era unha guerra de trincheiras e agora é unha guerra con drons", agregou.
Nesta liña, a ministra tamén aseverou que o mundo "está nunha situación difícil, complicada" e que nos países do norte de Europa hai un "verdadeiro temor e terror". "Vémolo estes días co servizo militar obrigatorio nalgúns lugares", engadiu.
Nese sentido, tamén afirmou que "por sorte non estamos nunha terceira guerra mundial", pero que hai países que "están sufrindo e pasándoo moi mal", como Gaza, a "difícil" situación do Líbano ou o que ocorre en Ucraína ou en África.
.jpg)
