Requisan 135 quilos de ameixa en Poio mentres os furtivos os repartían entre familiares
Requisan 135 quilos de ameixa en Poio mentres os furtivos os repartían entre familiares
A Policía Local de Poio considera que se trata dunha "ínfima parte" do que extraen
Os axentes teñen constancia de que un grupo organizado "esquilma o mar de xeito ilegal"
Marisco intervido polos axentes/Policía Local de Poio
Axentes da Policía Local de Poio interviñeron un total de 135 quilos de ameixa, capturados de xeito ilegal por furtivos, mentres os repartían entre os familiares.
A aprehensión produciuse o xoves e os axentes tiñan constancia de que un grupo organizado se dedicaba "a esquilmar o mar de xeito ilegal e continuo".
"Esta é unha ínfima parte dos que extraen semanalmente", puntualizaron os axentes. Así, este caso está relacionado cunha lancha que interviñeron sen ocupantes no municipio pontevedrés hai poucos meses.
A operación foi realizada diante do domicilio dos denunciados, onde repartían o bivalbo entre os seus familiares, introducíndoo dun piso a outro e a unha furgoneta alugada que se atopaba na porta. Así, procederon á intervención da mercadoría aos cinco membros dunha mesma familia, que segundo o relato policial, atentaron contra os axentes, tentaron intimidar e mesmo uns deles "alzou un pau de grandes dimensións" e "ameazounos de morte", polo que solicitaron o apoio da Garda Civil.
Marisco en sete sacos
Con todo, aprehenderon o marisco en sete sacos e procederon á identificación de cinco homes, que xa contaban con antecedentes por feitos similares. Posteriormente, o marisco foi pesado e devolto ao mar coa colaboración dos gardapescas de Poio.
Aos furtivos impútanlles un suposto delito contra a flora e a fauna, un suposto delito de atentado a axentes da autoridade e un suposto delito de ameazas graves, dando conta deles no xulgado de garda.
A policía sospeita que as ameixas non foron extraídas na zona de Poio e poden proceder da zona do Morrazo, de Praceres, en Pontevedra, ou da zona de Ribeira, na Coruña.
