Recomendan ás aeroliñas evitar voar sobre o espazo aéreo de Irán

A Axencia Europea de Seguridade Aérea (EASA) recomenda ás aeroliñas non operar no espazo aéreo de Irán pola situación de alta tensión na zona e pola posibilidade dunha acción militar dos Estados Unidos.

Segundo informou o organismo nun comunicado, o estado de alerta máxima das defensas aéreas iranianas incrementa o risco de identificación errónea de aeronaves civís.

Advertencia tamén para países veciños

A EASA pide ademais aos operadores aéreos que extremen a precaución para os voos que crucen o espazo aéreo de países veciños.

A recomendación afecta especialmente aos Estados que albergan bases militares estadounidenses.

A axencia advirte de que non se pode descartar a posibilidade de accións de represalia contra activos estadounidenses na rexión.

Esta situación podería engadir riscos adicionais á seguridade do tráfico aéreo neses espazos.

O presidente dos Estados Unidos, Donald Trump, ameazou con intervir en Irán ante as protestas no país e a represión do goberno contra os manifestantes.

Pola súa banda, o presidente do Parlamento iraniano advertiu de que o país podería considerar obxectivos lexítimos Israel e as bases estadounidenses na rexión se Washington lanza un ataque militar.

A EASA mantén a recomendación mentres persista o actual nivel de tensión.