Recollen sinaturas contra as fochancas de tres estradas provinciais en Outeiro de Rei

Non hai alternativa que escape ás fochancas. Os buratos son unha constante en varias vías provinciais que atravesan Outeiro de Rei. Hai oito parroquias afectadas directamente, pero os problemas esténdense a máis lugares, segundo din os veciños.

"As estradas aquí son unha merda, falando claro. Non se pode nin andar. Saltas unha fochanca e pillas outras catro".

Indignados con esta situación, os veciños iniciaron unha recollida de sinaturas.

"Día a día isto vai a máis e deberían tomar unha determinación porque os impostos cóbrannolos".

As fochancas son moitas e de gran tamaño e xa causaron numerosos danos.

"Na miña casa levamos un amortecedor e dúas rodas e coma min máis, e os coches empezan a facer ruídos por todas partes".

Os veciños reclaman un arranxo en condicións e non os parches puntuais aos que din, os teñen acostumados.

"Veñen cun camión e fan un pequeno arranxo que ao pouco tempo a auga lévao".

Din que non van parar ata conseguir unha estrada en condicións e organizan xa mobilizacións.