Rafa Benítez: "Se veño ao Celta, é porque creo no proxecto"

Rafa Benítez eludiu este venres, na véspera do transcendental encontro contra o Granada en Balaídos, aclarar as condicións do seu contrato co Celta, cuxa vinculación expira en xuño de 2026 aínda que existe unha “ventá de saída” un ano antes, segundo revelou a nova presidenta Marian Mouriño.

“Se eu veño ao Celta, é porque creo no proxecto e quero que o proxecto funcione. Non é unha cuestión de cantos anos tes ou canto cobras. É unha cuestión de crer no proxecto”, explicou na súa comparecencia ante os xornalistas.

Neste sentido, dixo estar convencido de que o seu proxecto en Balaídos será “exitoso”, aínda que non sabe se o será “agora ou dentro dun ano”.

“Seino porque, analizando a maneira de facer as cousas e pola miña experiencia, percibo que se van facer as cousas ben. Agora hai unha serie de cousas que son como son e témolas que manexar a día de hoxe, pero hai outras decisións que teñen lóxica e sentido. Iso é o que creo que fará que o Celta creza na dirección adecuada”, destacou.

Por iso, Benítez cre que o problema “agora” non é se existe esa cláusula de saída no seu contrato, porque el está centrado “en sacar rendemento” a un equipo que se atopa en postos de descenso e leva máis de tres meses sen gañar en Liga.