Poñen en illamento unha muller en Alacant con síntomas compatibles co hantavirus
Trátase dunha persoa que estivo en contacto coa muller que faleceu a causa da enfermidade en Xohanesburgo
Localizada sen síntomas a surafricana que viaxou no avión en que ía a falecida en Xohanesburgo e que despois pasou unha semana en Barcelona
Identifican en Cataluña outra muller que viaxou coa neerlandesa falecida: non ten síntomas e fará a corentena na súa comunidade
Unha muller de 32 anos residente en Alacant é a primeira ingresada por sospeitas de hantavirus en España.
Este venres ingresou nun hospital alacantino.
Segundo a consellería valenciana de Sanidade, a esta muller trasladárona, como medida preventiva e seguindo o protocolo que aprobou este venres o Ministerio de Sanidade, a un cuarto con presión negativa dun hospital da provincia de Alacant.
A Dirección Xeral de Saúde Pública contactou con esta paciente tras recibir unha alerta a través do Sistema Europeo de Alertas.
O secretario de Estado de Sanidade, Javier Padilla, informara previamente de que había unha persoa "con síntomas compatibles" de hantavirus que estivera en contacto coa muller que faleceu en Xohanesburgo (Suráfrica), que fora trasladada a un hospital en Alacant como un caso sospeitoso e alí permanecerá en illamento.
"A persoa referiu síntomas compatibles, principalmente síntomas relacionados con tose, pero benestar xeral, mentres se atopaba no seu domicilio familiar en Alacant. De xeito inmediato, puxémonos en contacto coa Dirección Xeral de Saúde Pública de España e en coordinación coa Consellaría de Sanidade procedeuse ao seu traslado preventivo e seguro a un hospital", sinalou Padilla.
A paciente presenta sintomatoloxía respiratoria leve e está previsto que se lle tomen mostras para a súa remisión ao Centro Nacional de Microbioloxía, cuxos resultados se prevé que estean nun prazo de entre 24 e 48 horas.
A Consellería de Sanidade sinalou nun comunicado que informará da evolución do seguimento da paciente "en coherencia coa relevancia para o interese da cidadanía por un tema de saúde pública que transcendeu a nivel internacional".
Localizada sen síntomas a surafricana que viaxou no avión en que ía a falecida en Xohanesburgo e que despois pasou unha semana en Barcelona
A persoa que coincidiu nun avión coa neerlandesa falecida por hantavirus e que posteriormente pasou unha semana en Barcelona é unha muller surafricana que xa se atopa no seu país e non ten síntomas de infección, segundo informaron fontes do Ministerio de Sanidade este venres.
A muller foi localizada grazas á colaboración do Ministerio de Asuntos Exteriores, Unión Europea e Cooperación e do Ministerio do Interior, segundo confirmou o Centro de Coordinación de Alertas e Emerxencias Sanitarias, organismo dependente de Sanidade.
Esta muller surafricana coincidiu no avión coa neerlandesa do cruceiro MV Hondius, falecida posteriormente por hantavirus en Xohanesburgo.Actualmente, atópase no seu país asintomática, tras permanecer durante unha semana en Barcelona, aloxada soa nun hotel e sen contactos estreitos, segundo a investigación epidemiolóxica.
Responsables da Generalitat están a avaliar as actividades en Barcelona da cidadá surafricana, aínda que consideran que a posibilidade dunha infección é extraordinariamente remota.
Identifican en Cataluña un novo contacto do gromo de hantavirus
As autoridades sanitarias identificaron un novo contacto relacionado co gromo de hantavirus do cruceiro Hondius, que segundo precisa o Centro de Coordinación de Alertas e Emerxencias Sanitarias (CCAES), é unha muller que vive en Cataluña, non ten síntomas e viaxou no mesmo avión da neerlandesa falecida.
Segundo a investigación epidemiolóxica, esta persoa non fora identificada inicialmente debido a un cambio de asento no avión, circunstancia que dificultou a súa localización na primeira reconstrución de contactos, informaron fontes do Ministerio de Sanidade.
Esta muller sería o terceiro contacto identificado en España por coincidir nese avión coa neerlandesa falecida.
"De acordo co protocolo aprobado este mesmo venres, todas as persoas consideradas contactos, como é esta muller, deberán someterse a unha corentena obrigatoria, pero no seu caso non será no Hospital Central da Defensa Gómez Ulla, en Madrid, senón nun centro catalán ao ser identificado polas autoridades desta comunidade", explican fontes do Ministerio de Sanidade.
Este novo contacto deberá permanecer en habitacións individuais e sen visitas, con vixilancia activa que inclúe o rexistro da temperatura dúas veces ao día para detectar precozmente calquera síntoma compatible.
Tamén se practicará unha proba de PCR e outra aos sete días.
