Patrimonio comeza a reparar este luns a derruba da muralla de Lugo
Van revisar se existe unha antiga escaleira de acceso ao adarve, que podería ser a causa das filtracións
O domingo caeu un treito do interior da construción romana tras varios días de chuvias persistentes
A Xunta inicia este luns os traballos de reparación da derruba dun treito do interior da muralla de Lugo, entre as portas do Carme e de Santiago.
Ademais, nos seguintes días vai facer unha revisión completa da construción romana para detectar os "puntos débiles" e descartar outros danos.
Anunciouno o conselleiro de Cultura, Lingua e Xuventude, José López Campos, durante unha visita este domingo á zona afectada, á que acudiu acompañado polo director xeral de Patrimonio, Ángel Miramontes, e o delegado da Xunta en Lugo, Javier Arias.
López Campos relacionou as fortes precipitacións dos últimos días co desprendemento de pedras no lenzo interior da muralla, á altura da rúa do Moucho, un factor que xa vinculara co incidente o alcalde, Miguel Fernández, unhas horas antes.
O tramo caído, segundo explicou o conselleiro, non forma parte do trazado orixinal romano, senón dunha reconstrución posterior "económica e equivocada" feita con terra e entullos, o que deixou este lenzo da muralla en estado vulnerable.
Segundo dixo, o seu departamento actuará "coa máxima urxencia e celeridade" para garantir a conservación deste ben declarado Patrimonio da Humanidade.
Persoal técnico da Dirección Xeral de Patrimonio Cultural fixo unha primeira inspección na noite do sábado e o inicio dos traballos de reparación, na que van reutilizar as pedras, está previsto para este mesmo luns.
A Xunta estima que se poderá deixar aberta a rúa nas primeiras horas. Tamén se colocarán uns valos no adarve da muralla para evitar que a xente se achegue á zona.
Posible escaleira interior
Patrimonio estima que as filtracións nesta zona da muralla poderían deberse á existencia dunha escaleira interior, como as que se atoparon nos últimos anos en todo o monumento e que se anulou coa construción do paramento derrubado.
Ademais da restauración, realizarán unha revisión completa do recinto amurallado para descartar danos e revisar "os puntos débiles", apoiándose nos sistemas de monitorización contemplados no Plan Director.
Así mesmo, o equipo técnico prognosticou a posibilidade de que colapse tamén o muro do Pazo de Dona Urraca, situado á beira do monumento, pero que non forma parte do conxunto protexido.
Por iso, protexeuse a zona cun balizamento "para evitar danos a terceiras persoas", en palabras do conselleiro. Tamén se avisou aos propietarios para que actúen nese punto.
Outros derrubamentos
Non é a primeira vez que a muralla romana sofre danos como consecuencia de episodios de choivas intensas.
O último derrubamento de relevancia produciuse pouco despois da súa declaración pola Unesco e afectou un tramo situado nas inmediacións do hospital de Santa María.
López Campos reiterou "o compromiso continuado da Xunta coa conservación da muralla de Lugo, un dos símbolos patrimoniais máis destacados de Galicia".
Desde a súa declaración como Patrimonio Mundial no 2000 -un recoñecemento que o pasado ano cumpriu 25 anos-, "o Goberno galego investiu máis de 10 millóns de euros nunhas 60 actuacións de conservación e posta en valor", lembrou.
Así mesmo, amosou o seu agradecemento ao equipo técnico e os servizos de urxencia que traballaron no lugar desde que se produciu o derrubamento sobre as 23:30 horas.
.png)
