O paro é case total na automoción en Galicia e tamén en Navantia Ferrol, segundo a CIG
A central nacionalista sinala que a folga xeral arrincou na nosa comunidade cun amplo seguimento na industria e nos servizos urbanos
A CIG denuncia unha actuación policial "desproporcionada" en cidades como Lugo
Seguimento da folga xeral en Vigo, segundo imaxes enviadas polo sindicato CIG
A Confederación Intersindical Galega (CIG) asegura que a folga xeral, a primeira convocada en 14 anos, rexistra un amplo seguimento na industria e nos servizos urbanos durante a primeira quenda da noite.
Segundo o sindicato nacionalista, a actividade nocturna freosue case ao completo na automoción de Vigo e O Porriño, unha presenza puramente testemuñal en plantas como BorgWarner Zamáns; onde, de 152 traballadores, só asistiron 3 mandos e 8 operarios. O seguimento tamén é salientable en factorías como Pescanova Chapela e na farmacéutica Cofano; tampouco houbo actividade na quenda nocturna de Navantia en Ferrol e houbo un parón relevante durante a noite no centro loxístico de Zara.
O servizo de recollida do lixo está totalmente paralizado en Vigo, na cidade da Coruña e nos municipios do Consorcio das Mariñas.
A central sostén que, desde o inicio do paro, despregáronse piquetes informativos nos polígonos e factorías das principais cidades e pobos do país e denuncia unha actuación policial "desproporcionada" con identificacións a integrantes do piquete nas instalacións de Ecolugo.
