Pardo de Vera descarta irregularidades nas obras investigadas no caso Koldo e sostén que era imposible amañar os contratos

A expresidenta do Adif Isabel Pardo de Vera descartou a existencia de calquera irregularidade nas obras baixo sospeita no caso Koldo e asegurou que era imposible amañar os contratos, xa que en cada unha das adxudicacións participaron entre 25 e 50 técnicos e analizáronse máis de cen informes de organismos do administrador ferroviario e de entidades independentes antes de autorizar os proxectos.

Pardo de Vera, investigada na Audiencia Nacional polo caso Koldo, presentou cinco informes ao xuíz instrutor da causa, Ismael Moreno, nos que detalla as matrices técnicas dos contratos do Adif que están baixo sospeita.

Todo isto prodúcese no marco da investigación dirixida por Moreno sobre presuntos amaños en contratos públicos, unha causa en que tamén están imputados, entre outros, o exsecretario de Organización do PSOE Santos Cerdán e varios empresarios.

"A análise da documentación do expediente permite concluír que as actuacións examinadas estiveron documentadas e sometidas a controis internos, colexiados, técnicos, xurídicos e de inspección, o que permite descartar de plano calquera tipo de irregularidade", sostén Pardo de Vera nos informes.

Defensa do sistema de contratación

A expresidenta do Adif, que elaborou os informes na súa condición de enxeñeira perita, sinala que foi ela quen implantou un sistema de transparencia e trazabilidade dos contratos da entidade. Ademais, indica que redactou estas peritaxes como especialista en contratación de obra ferroviaria.

Nese sentido, as mesmas fontes aseguran que en cada adxudicación interviñeron entre 25 e 50 funcionarios de distintos departamentos e que se analizaron máis de cen informes independentes procedentes de organismos do Adif e institucións externas, en ámbitos que abranguen desde a enxeñería ata os aspectos xurídicos, administrativos e económicos.

Trazabilidade incompatible coa corrupción

Segundo a valoración de Pardo de Vera, a existencia dunha ampla rede de supervisión, transparencia e trazabilidade resulta incompatible con calquera acusación de corrupción.

A expresidenta conclúe que todos os pasos e actuacións desenvolvidos estiveron debidamente xustificados e documentados e sometidos a numerosos controis internos e externos, circunstancias que, ao seu xuízo, permiten descartar calquera irregularidade.

Na súa opinión, a participación dun amplo número de persoal técnico e órganos administrativos confirma que a tramitación das licitacións investigadas se desenvolveu conforme á legalidade.

Pardo de Vera insiste tamén en que a súa intervención foi unicamente de carácter orgánico e reitera que participaron decenas de funcionarios e organismos para garantir a integridade dos procedementos.

En concreto, trasladou ao xuíz unha explicación ordenada do proceso de concesión das adxudicacións dos contratos de alta velocidade a Acciona, Ferrovial, OPR e ASCH en Sant Feliu de Llobregat, Almería, Murcia, Asturias e Lugo.

Ademais, detalla os órganos que interviñeron, os informes emitidos, as mesas de contratación que actuaron, os controis xurídicos e económicos aplicados, a documentación asinada, as competencias correspondentes a cada nivel administrativo e os posibles nexos causais atribuíbles a determinadas persoas.