Os xogadores do Coruxo ven xusta a vitoria ante Ceares

Semellaba un partido que se lle poñía de cara ben cedo ao Coruxo. Pero houbo que sufrir. Finalmente, no encontro que servía de despedida do campo de Fragoselo, o equipo vigués sumou tres importantes puntos que lle permiten achegarse aos postos altos da clasificación.

Tralo partido, a Radio Galega conversou con dous dos goleadores. Un deles foi Mateo Míguez, autor do terceiro tanto verde.

"Saímos moi enchufados. Tivemos moitas ocasións na 1ª parte e deixamos o partido encarrilado. Chiqui facilita moito as accións aos que estamos por dentro. Moi contento polo gol e polos tres puntos. Tivemos 10 minutos de desconexión cando nos vimos co partido gañado. Aínda así considero xusto o resultado"

Ademáis de Míguez, e de Youssef, o que abriu a lata, Chiqui foi o outro futbolista que marcou gol en Fragoselo.

"Foi un bonito gol. Nunha xogada case igual, antes, disparei ao pau. Ceares viña a polos 3 puntos porque para eles é unha final. Co segundo tivemos tranquilidade pero ao final sempre hai que loitar ata o asubío. Estamos coma locais xogando bos partidos. Ninguén se pode relaxar nun partido desta categoría. Hai que seguir así para mirar para arriba"