Os reis conmemoran os seus vinte anos de matrimonio

Os reis conmemoran este mércores os seus vinte anos de casados, un aniversario redondo dunha voda histórica ao que chegan con boa sintonía como matrimonio e compenetrados no seu labor institucional á fronte da Coroa.

A catedral da Almudena foi o escenario da primeira voda real celebrada en Madrid en case un século, desde a de Afonso XIII en 1906, ao que se engadiu o feito inédito de que a princesa de Asturias pasaba a ser unha muller sen liñaxe monárquica, xornalista de profesión e divorciada cinco anos antes do profesor e escritor Alonso Guerrero.

O evento, que congregou 1.700 invitados, entre eles, numerosos representantes de casas reais e de gobernos, quedou marcado pola choiva torrencial no momento da cerimonia e polo posterior percorrido polas rúas de Madrid ante os cidadáns. 

Coa conmoción aínda presente polas 192 vítimas que deixaron os atentados do 11M cometidos dous meses antes, Filipe de Borbón, de 36 anos, e Letizia Ortiz, de 31, dixeron si quero para poñer a primeira pedra con que se converteren nos futuros reis de España tras revelarse a súa relación en novembro do ano anterior.

“Non podo nin quero escondelo, imaxino que salta á vista. Son un home feliz, e teño a certeza de que esta condición ma dá sentir a emoción de ver e protagonizar a realización dun desexo: casei coa muller que amo", confesou don Filipe no banquete no Palacio Real.

Dúas décadas despois, a parella transmite que segue namorada, comprometida e consolidada no trono en portas de que se cumpra o décimo aniversario do reinado o 19 de xuño. Os reis despexaron este mércores a súa axenda de actos públicos e festexan o aniversario sen a princesa Leonor e a infanta Sofía, ao atopárense na Academia Militar de Zaragoza e no internado de Gales (Reino Unido), respectivamente.

Con elas celebraron a efeméride a pasada fin de semana ao publicar a Casa Real once fotos familiares tomadas hai poucas semanas, en que os catro compartiron protagonismo para mostrar o unidos que están. Nunha delas, aparecían os reis en solitario, con don Filipe abrazando a súa esposa ante a fachada do Palacio Real.

Ambos exhibiron nos últimos anos algúns xestos de complicidade e mostras de agarimo en público fronte aos rumores que, ocasionalmente, falan de crise matrimonial. Unha desas imaxes foi a foto divulgada o pasado 21 de outubro en Oviedo, cando reproduciron ante as súas fillas o primeiro saúdo de había vinte anos no hotel Reconquista, días antes de anunciarse o noivado entre o daquela príncipe de Asturias e a presentadora de TVE.

Rechamante foi ver a raíña poñerlle o pano de San Fermín no pescozo ou, no día de San Valentín, visitar Doñana ou vestir o traxe da pedida de man. En varias ocasións protagonizaron saídas ao cinema, unha das afeccións que comparten, e tamén fan plans por separado, como cando o monarca fora esquiar cos seus amigos ou a encontros con militares da súa promoción.

Filipe VI sempre mantivo a alianza de voda, mentres que a raíña se desposuíu dela hai uns anos, aínda que posteriormente luciu algún anel cunha chiscadela á relación. A parella atravesou un momento difícil no verán de 2013, un ano antes da proclamación de Filipe VI, cando dona Letizia abandonou Palma antes de tempo despois de só cinco días de estadía no Palacio de Marivent, onde quedaron o príncipe e as súas fillas.

A conduta interpretouse como un distanciamento, ao que se uniu cinco meses despois a información en portada dun xornal o día en que o herdeiro cumpría 46 anos, na que, segundo fontes da Casa Real, a parella tivera “altos e baixos”, como calquera outro matrimonio.