Os mercados galegos, ateigados, onde se chegaron a pagar ata 300 euros/kg polos camaróns
Moitos agardaron a estas horas previas para facerse co peixe e marisco do día, pero pagaron máis este venres que se mercasen antes para conxelar
Estes últimos días foron de moito movemento nas prazas de abastos galegas. Tamén esta mesma mañá. Moitos agardaron a estas horas previas para facerse co peixe e marisco do día, pero pagaron máis este venres que se mercasen antes para conxelar.
Os prezos do marisco e do peixe están polas nubes nesta Noiteboa. Os máis caros en todas as prazas son os camaróns. O que poden pedir depende do tamaño, pero oscila entre os 60 euros o quilo e os trescentos. Séguenlle en prezo os percebes que poden roldar entre os 110 e os 180 euros o quilo. A centola entre 45 e 50 euros. E para a ameixa, a máis prezada, a babosa, hai que desembolsar ata 30 euros o quilo.
O peixe non é alleo ás subas propias deste 24 de decembro. O ollomol chega aos 38 euros o quilo. O peixe sapo custa arredor de 30 euros o quilo. E a robaliza, sobre 27 euros. Pode facerse cunha pescada por 16 euros o quilo, é dos máis baratos entre os peixes brancos salvaxes e unha opción moi socorrida na cociña.
