Os expertos auguran unha desaceleración nas subas de tipos tras as últimas crebas de bancos
Os expertos auguran unha desaceleración nas subas de tipos tras as últimas crebas de bancos
A Reserva Federal podería moderar os incrementos previstos no prezo do diñeiro
Calviño pide que se acelere a unión bancaria na UE
Vinte e catro horas despois de que saltasen as alarmas, a calma volve ao sistema bancario mundial. O First Republic Bank, por quen moitos apostaban como a seguinte peza en caer, recuperou este martes case toda a valoración que perdera nos primeiros momentos de pánico.
E o mesmo co resto da banca rexional estadounidense. Pero as crebas do Sillicon Valley Bank e do Signature Bank poden facer que a Reserva Federal o pense dúas veces antes de seguir coa agresiva política de subas das taxas de xuro que estaba practicando.
"As expectativas caeron significativamente ante a perspectiva de que xa estamos empezando a ver no sistema os impactos que pode ter unha suba de tipos tan rápida como a que tivemos" pensa Jorge Sicilia, director de BBVA Research.
A inflación, que este martes baixou ata o 6 % nos Estados Unidos, tamén facilita unha relaxación da política monetaria. Outra cousa é o que vaia facer o Banco Central Europeo. Os expertos cren que se van manter as subas de tipos xa anunciadas.
As autoridades insisten en que a situación da banca europea é sólida e saneada, pero algúns, como España, piden tomar nota do acontecido.
Nadia Calviño, ministra de Asuntos Económicos , di: "Estes acontecementos poñen de relevo a necesidade de avanzar o antes posible para completar e reforzar a unión bancaria, para ter un sistema único de garantía de depósitos e un sistema único de xestión de crises bancarias".
As expectativas de moderación nas subas das taxas de xuro deixaron un efecto inesperado: o Euribor baixou por primeira vez en moitos meses. Está no 3,5 %, case medio punto menos que o venres.