Os EUA propoñen revisar cinco anos de historial nas redes sociais a turistas de 42 países
A medida afectaría viaxeiros acollidos ao programa de exención de visado
Trump defende o plan como unha garantía de seguridade nacional
Os turistas procedentes de 42 países incluídos no programa de exención de visado poderían ter que entregar o historial das súas redes sociais dos últimos cinco anos para entrar nos Estados Unidos, segundo unha proposta presentada este mércores polo Goberno de Donald Trump.
A iniciativa, impulsada pola Oficina de Aduanas e Protección Fronteiriza (CBP), busca examinar con máis detalle a actividade das persoas que solicitan autorización para viaxar baixo o Sistema Electrónico de Autorización de Viaxe (ESTA).
Trump defendeu que o propósito da medida é asegurar que só entren persoas seguras.
“Queremos asegurarnos de non permitir que entren persoas equivocadas”, indicou nunha conferencia na Casa Branca.
Máis datos persoais e unha ferramenta para rexistrar saídas
A proposta publicada no Rexistro Federal amplía a información que se pedirá aos viaxeiros que entren no país durante estadías de ata tres meses. O programa abrangue países como Reino Unido, Irlanda, Nova Zelandia, Australia, Francia, Xapón, Israel ou Qatar, entre outros.
Ademais do historial en redes sociais, os Estados Unidos pretende solicitar números de teléfono e enderezos de correo electrónico utilizados na última década, así como datos familiares: nomes, datas e lugares de nacemento.
O plan incorpora tamén unha ferramenta móbil para que calquera persoa estranxeira poida rexistrar a súa saída do país.
A CBP xustifica a proposta nunha orde emitida por Trump en xaneiro para reforzar a protección fronte a ameazas á seguridade nacional e pública.
O público poderá presentar comentarios sobre a medida, que introduce novas esixencias para os viaxeiros e podería afectar o turismo, especialmente de cara ao Mundial de 2026, ao que se prevé que acudan numerosos visitantes dos países acollidos ao ESTA.
