O xuíz cita a declarar como investigada a exmuller de Koldo García

O xuíz da Audiencia Nacional Ismael Moreno citou a declarar como investigada a Patricia Úriz, exmuller do exasesor ministerial Koldo García, no marco do denominado caso Koldo.

A comparecencia terá lugar o próximo 20 de xaneiro, tras unha petición da Fiscalía aceptada polo maxistrado.

Indicios de branqueo de capitais

A Fiscalía sostén que nun atestado da Garda Civil do 3 de outubro se describen condutas compatibles cun posible delito de branqueo de capitais, que non se reflectiran ata agora neste procedemento.

Patricia Úriz traballou no Ministerio de Transportes durante a etapa na que esta carteira estaba dirixida por José Luis Ábalos.

Segundo os investigadores, o matrimonio formado por Úriz e Koldo García custodiaba e xestionaba diñeiro en efectivo vinculado ao exministro.

Nas conversacións da parella aparecen termos como chistorras, soles e leitugas para referirse a distintas cantidades de diñeiro en metálico.

A Garda Civil apunta tamén á existencia dunha suposta contabilidade A e B relacionada con gastos atribuídos a Ábalos.