O Tribunal de Contas sanciona a Vox con 862.000 euros por recibir doazóns anónimas

O Tribunal de Contas sancionou a Vox con 862.000 euros por recibir doazóns non identificadas en efectivo nos exercicios 2018, 2019 e 2020.

O Tribunal de Contas informou de que o Pleno da institución acordou na súa última reunión esa sanción por infracción moi grave e de que se aprobou co voto particular de dous dos seus conselleiros.

A resolución adoptada polo pleno do Tribunal de Contas é susceptible de recurso contencioso-administrativo ante o Tribunal Supremo.

Segundo o informe de fiscalización de 2020 que o Tribunal aprobou en xuño de 2024, Vox recibiu 102.048 euros ese ano mediante ingresos por caixeiro automático nas súas contas correntes sen identificación de quen os realizaba, mentres que segundo o informe de fiscalización dos exercicios 2018 e 2019, publicado en outubro de 2023, as cantidades por ese concepto alcanzaron os 20.601 e 311.947 euros, respectivamente.

A cantidade dos tres exercicios ascende a 434.596 euros e, segundo a Lei Orgánica sobre Financiamento dos Partidos Políticos, o importe da sanción por infracción moi grave será de entre o dobre e o quíntuplo da cantidade que exceda do límite legalmente esixido.

Se o Tribunal considerase que se trataron efectivamente de doazóns anónimas todos os ingresos, a sanción mínima sería de 869.192 euros (o dobre), polo que excluíu algúns ingresos desa consideración.

O 8 de xullo de 2024 o Tribunal de Contas xa sancionou con 233.324 euros a Vox por doazóns irregulares en 2018 e 2019, neste caso por doazóns con carácter finalista, que tamén son consideradas infraccións moi graves.

Vox recorrerá ao Supremo

Vox anunciou nun comunicado que recorrerá ante o Tribunal Supremo a sanción, que considera "inxusta", porque entende que é contraria á lei, ás resolucións do Tribunal de Contas e aos seus antecedentes, "pois noutras ocasións arquivou asuntos idénticos".

Vox explicou na súa nota que eses ingresos debíanse a "a actividade promocional a través de mesas informativas" e apuntou que confía en que sexa anulada esta sanción, e tamén a outra que recorreu por doazóns de carácter finalista que, segundo o partido, eran "para cubrir a fianza contra os separatistas" cataláns.

Vox fixo fincapé en que a decisión do Tribunal de Contas non é unánime, xa que dúas dos seus conselleiros emitiron votos particulares "nos que defenden que non hai motivo algún para a sanción".