O Supremo xulga a Ábalos, Koldo e Aldama polo caso das máscaras

O exministro José Luis Ábalos, o seu exasesor Koldo García e o empresario Víctor de Aldama sentan este martes no banco dos acusados do Tribunal Supremo por presuntas irregularidades nos contratos de máscaras adxudicados desde o Ministerio de Transportes durante a pandemia.

Tanto Ábalos como Koldo están en prisión provisional desde o pasado 27 de novembro. Ambos decláranse inocentes e aseguran que non cometeron ningún delito.

Unha rede que naceu en 2020 e tiña vocación de permanencia

No seu escrito de acusación, o responsable da Fiscalía Anticorrupción sinala que a presunta trama estivo operando durante varios anos e tiña a innegable vocación de permanencia no tempo.

Alejandro Luzón explica que os tres acusados se aproveitaron do cargo do entón ministro para favorecer a contratación coa Administración coa intención de enriquecérense a cambio do correspondente beneficio económico.

Segundo a Fiscalía, os tres eran apoiados de xeito puntual ou continuo tanto por outras autoridades e funcionarios de Transportes como por distintas persoas da contorna empresarial de Aldama e por familiares de Koldo.

Anticorrupción pide 24 anos de cárcere para Ábalos e 19 anos e medio para Koldo por presuntos delitos de pertenza a organización criminal, suborno, aproveitamento de información privilexiada, tráfico de influencias e malversación. Ademais, solicita o pago dunha multa de 3,8 millóns de euros.

Para Aldama reclama 7 anos de prisión e unha multa de 3,7 millóns por eses tres primeiros delitos, dos que se declarou culpable. A petición de pena é inferior á dos outros dous acusados porque se lle aplica a atenuante de confesión.

As acusacións populares que encabeza o PP reclaman 30 anos de cárcere para o exministro e o seu exasesor, mentres que para Aldama solicitan a mesma pena que o fiscal.

O xefe e o alter ego

Segundo o relato do Ministerio Público, cada un dos acusados asumiu un papel diverso e complementario na organización, nunha precisa repartición de funcións que se revelou moi eficaz.

Tanto Koldo como Aldama consideraban a Ábalos como o xefe e valíanse de Koldo como o seu home de confianza. Tanto é así que, a xuízo da Fiscalía, Koldo converteuse máis en asistente que en asesor, pois desempeñou para Ábalos un bo número de tarefas de moi diversa índole, tanto profesionais como privadas, lícitas e ilícitas, antes e despois da etapa ministerial, que se estendeu tres anos.

"Koldo García foi o alter ego de José Luis Ábalos durante o seu mandato a cargo do ministerio, ata o punto de que, tanto no propio ministerio como no seo doutras administracións públicas, se sobreentendía que Koldo era o fiel transmisor das decisións e os desexos de Ábalos, habitualmente parapetado tras o seu asesor", describe Luzón.

En concreto, pon o foco en que Koldo manexou as fontes ilegais de diñeiro en efectivo de Ábalos, que con frecuencia se confundían coas propias, actuando de facto como home de palla do seu superior nas actividades delituosas que ben pronto ambos acometeron ao amparo dos seus cargos coa colaboración, entre outros, do tamén acusado Víctor de Aldama.

A interlocución privilexiada de Aldama

Aldama, o presunto conseguidor da trama, tiña acceso preferente ao exministro. Anticorrupción defíneo como un empresario español que tiña unha interlocución privilexiada e con intereses nun bo número de sociedades vinculadas a variados sectores, tales como o inmobiliario, o hostaleiro e o da venda de hidrocarburos.

El foi quen, en plena pandemia, adquiriu material sanitario e confeccionou a oferta idónea para captar os contratos, primeiro en Transportes e organismos satélite, e despois nas administracións canaria e balear, sempre a cambio da correspondente prestación económica, da que igualmente facía partícipes a Ábalos e Koldo.

Ata 10.000 euros mensuais chegaron a percibir Aldama e os seus socios, ademais do pago de alugueiros de casas para eles ou as súas parellas, algunhas contratadas por empresas públicas.

Máis de 70 testemuñas en tres semanas de xuízo

O xuízo terá lugar no Salón de Plenos do Supremo ao longo de 13 sesións. Desde ese martes 7 de abril e ata o 30 deste mes, máis de 70 persoas comparecerán como testemuñas ante o tribunal, que estará presidido polo presidente da Sala do Penal, Andrés Martínez Arrieta.

Os primeiros en facelo serán un fillo de Ábalos, un irmán de Koldo, varios socios de Aldama e Jessica Rodríguez, exparella do exministro.

Entre esas testemuñas que intervirán no xuízo, destacan o ministro de Política Territorial e Memoria Democrática Ángel Víctor Torres e a presidenta do Congreso dos Deputados Francina Armengol, que presidiron durante a pandemia as comunidades autónomas de Canarias e Baleares, respectivamente.

Tamén testificarán, entre outros, varios exaltos cargos de Transportes, como a expresidenta de Adif Isabel Pardo de Vera, empresarios ou axentes da Unidade Central Operativa (UCO) da Garda Civil que investigaron a presunta trama. Os maxistrados que celebrarán o xuízo serán Martínez Arrieta, Manuel Marchena, Andrés Palomo, Susana Polo, Eduardo de Porres, Julián Sánchez Melgar e Javier Hernández.

Os tres acusados declararán, previsiblemente, o próximo 28 de abril.