O senador colombiano Miguel Uribe está en "estado crítico" tras sufrir un atentado

O senador colombiano Miguel Uribe Turbay, un dos aspirantes presidenciais do partido uribista Centro Democrático para as eleccións de 2026, está en "estado crítico" polo atentado a tiros que sufriu este sábado nun acto de campaña en Bogotá, confirmou a Fundación Santa Fe, onde foi ingresado.

"Recibimos no noso Instituto de Urxencias o señor Miguel Uribe Turbay, que ingresou en estado crítico e está a ser atendido de maneira prioritaria polo noso equipo de especialistas. Neste momento atópase en procedemento neurocirúrxico e vascular periférico", dixo a clínica no primeiro parte médico sobre a saúde do senador.

O ataque ocorreu no barrio Modelia, no oeste de Bogotá, onde Uribe Turbay, que participaba nun mitin político, recibiu dous disparos, segundo un comunicado da Fiscalía, que confirmou que o presunto autor do atentado é un menor de 15 anos que foi detido no lugar dos feitos cunha pistola.

O congresista foi trasladado inicialmente á clínica Medicentro e de alí á Fundación Santa Fe, un dos hospitais máis prestixiosos do país, para someterse a unha intervención cirúrxica. 

"Desde o momento da súa chegada activáronse todos os protocolos de atención de alta complexidade requiridos. O noso equipo asistencial e os recursos técnicos da institución están plenamente dispostos para brindar o tratamento necesario co maior compromiso, rigorosidade e humanidade", engadiu o centro médico.

O congresista é un político próximo ao expresidente Álvaro Uribe e un dos máis severos críticos do presidente colombiano, Gustavo Petro, especialmente pola deterioración da seguridade no país.

O senador, que foi o congresista máis votado nas eleccións de 2022, é fillo de Diana Turbay, xornalista que foi secuestrada e asasinada en 1991 por narcotraficantes ao servizo de Pablo Escobar, e neto do expresidente Julio César Turbay, que gobernou o país entre 1978 e 1982.