O salario mínimo subirá un 5,3 % en 2027, ata os 1.286 euros brutos ao mes

O Goberno subirá o salario mínimo interprofesional (SMI) un 5,3 % en 2027, ata os 1.286 euros brutos ao mes en catorce pagas, segundo a memoria do real decreto que someteu o Ministerio de Traballo a audiencia e información pública.

Esta subida é superior á exposta o mércores pola comisión de expertos que asesora ao Ministerio de Traballo, que recomendaba subir o SMI un 4,9 % en 2027, unha proposta que foi trasladada posteriormente aos axentes sociais sen entrar en pormenores da negociación.

O prazo para presentar achegas ao proxecto da norma conclúe o próximo 16 de novembro, momento a partir do cal podería ser aprobado polo Consello de Ministros. 

Unha suba impulsada sen o consenso dos sindicatos e coa oposición da patronal

Trátase da primeira vez que a ministra de Traballo Yolanda Díaz impulsa un real decreto de subida sen o consenso dos sindicatos, que reclamaran un incremento do 7 % e advertiron de que se non se abordaba a compensación e absorción de pluses e complementos non selarían un acordo.

A patronal, que non apoiou as últimas subidas do SMI, tacha de electoralista unha medida que podería ser aprobada en plena campaña ás eleccións xerais do 29N e reclámase máis tempo para o diálogo.

O Goberno ten a potestade de aprobar o incremento do SMI previa consulta aos axentes sociais, en tanto que, ao tratarse dun real decreto, non necesita recibir o visto e prace das Cortes, e podería levalo cabo tras os comicios incluso estando en funcións.

De feito, a ministra de Traballo Yolanda Díaz defendeu que a subida do SMI non pode verse atrasada pola convocatoria electoral porque todas as empresas teñen que saber o 1 de xaneiro cal é o salario mínimo.

Con esta subida, aténdese de xeito efectivo ao dereito a unha remuneración equitativa e suficiente que proporcione ás persoas traballadoras e ás súas familias un nivel de vida decoroso. O obxectivo é que o SMI alcance o 60 % do salario medio, tal e como establece a Carta Social Europea.

A subida do SMI é urxente

"É urxente poñerse ao choio", xustificaba onte o secretario de Estado de Traballo Joaquín Peréz Rey ao ser preguntado polo informe dos expertos que transcendeu ese mesma mañá e de convocar os axentes sociais horas máis tarde.

Os sindicatos mantiveron a súa formulación de subida do 7 %, porque prevé a desviación do 3,1 % ao 4,9 % do IPC para o ano 2026 e a proxección do 4,9 % para o 2027, explicaban a EFE fontes de CCOO.

O sindicato esixía tamén a aprobación dunha norma que impida a absorción dos pluses para compensar a subida do SMI e pedía aclarar o impacto na tributación fiscal e garantir que o resultado sexa que se asegure de xeito neto o poder adquisitivo.

Neste sentido, a ministra de Seguridade Social e portavoz do Gobierno Elma Saiz asegurou recentemente que o SMI seguirá sen pagar o imposto para a renda das persoas físicas (IRPF).

"Imos seguir con este compromiso de seguir subindo o SMI e que siga estando exento de tributación", dixo Saiz, deixando claro que o Goberno actualizará a dedución para que quen cobra o SMI non pague IRPF.

Na actualidade, aos traballadores que cobran o SMI (17.094 euros) aplícase unha dedución de 591 euros, o cal garante que non tributen con independencia das súas circunstancias privadas.

A súa actualización implica unha reforma legal que deberá ser aprobada na Deputación Permanente ou, previsiblemente, unha vez comezado 2027, polo novo Goberno que saia das urnas.