O Río Breogán manda no baloncesto galego

O Breogán fíxose coa súa 15ª Copa Galicia ao derrotar por 96-81 o Leyma Coruña unha semana antes do comezo da Liga ACB. Foi o último partido de preparación dos dous equipos antes de estrearse na competición ligueira. 

O enfrontamento foi máis igualado do que di o marcador. De feito, o Leyma tivo unha boa saída (7-10) á que respondeu o Breogán cun parcial de 8-0 para coller o mando no primeiro cuarto (26-21).

Ata o descanso mantívose a diferenza (44-38), pero cun bo momento do cadro coruñés, que conseguiu poñerse por diante dun xeito efémero (32-33). Parecía que o Breogán marchaba no terceiro período (50-40). O Leyma reaccionou cun 0-7 e chegou só tres abaixo ao último segundo (63-60). Unha tripla de Hilliard sobre a bucina foi o principio do fin para o conxunto coruñés. 

Esa canastra marcou un antes e un despois porque o inicio do Breogán resultou asoballador. Abriu unha fenda de catorce puntos (74-60) e xa non soltaría o dominio do partido. Sakho anotou 17 puntos e 25 de valoración, con Jordan Davis e Hilliard (os dous con 14) facendo dano desde o exterior. No Leyma o máis atinado foi Burjanadze (15 puntos).