O PSOE pide a Ábalos que entregue a súa acta de deputado por "responsabilidade política"

A Comisión Executiva Federal do Partido Socialista decidiu este luns "por unanimidade" solicitar ao exministro José Luis Ábalos a entrega da súa acta ao Grupo Socialista, segundo anunciou a portavoz do PSOE, Esther Peña, que dixo que espera que o faga "nas próximas 24 horas", e así llo comunicaron.

O PSOE considera que "si existe unha responsabilidade política" por parte de Ábalos, a pesar de que non está investigado, nin sinalado, nin imputado nin o seu nome figura na investigación".

"Non nos sentimos xuíces, non somos fiscais, non xulgamos, pero a pesar de todo o Comité Executivo Federal considera que si existe unha responsabilidade política", dixo Esther Peña. 

Ademais de reclamar a Ábalos a súa acta de deputado, o PSOE acordou rexistrar de maneira inmediata no Congreso a solicitude de creación dunha comisión dunha investigación sobre a compra de material sanitario polas administracións públicas durante a pandemia do coronavirus.

A súa primeira tarefa, explicou Peña, será o caso que afecta a un suposto cobro de comisións por parte do exasesor do exministro de Fomento. 

A portavoz do PSOE asegurou que "varias" persoas do partido falaron con Ábalos nos últimos días, sen dar nomes concretos, e engadiu que a decisión sobre a entrega da acta tena que tomar o propio deputado, a quen informará da resolución da Executiva polas vías "habituais".

"Non teño ningunha dúbida de que José Luis Ábalos actuará en consecuencia por este ben maior que é o PSOE e, ademais, porque creo que neste caso a aparencia tamén nos vén ben", dixo Peña, que asegurou que o exministro é un exemplo de "ortodoxia de partido, compromiso e respecto á historia" da formación.

Doutra banda, subliñou o compromiso do PSOE contra a corrupción política, así como a "colaboración coa Xustiza, a transparencia absoluta e a asunción de responsabilidades", e contrapuxo esta actitude á do PP nos casos de corrupción nos que este partido estivo involucrado.

"Aquí non se escoitan ruídos de marteladas a computadores portátiles nin destrucións de discos duros. Así que desde o PSOE, transparencia absoluta con toda a convicción, caia quen caia, como dixo o noso presidente do Goberno e secretario xeral", sostivo.

Neste sentido, destacou que no PSOE son distintos ao PP, xa que asumen responsabilidades "moi por encima das xudiciais, polo ben da política e polo ben das institucións".

Sobre a comisión de investigación que solicitarán no Congreso, comentou que "ninguén debería sentirse intimidado" xa que no PSOE non o están e o seu único obxectivo, indicou, é rebelarse "contra a desvergonza de todos aqueles que quixeron lucrarse mentres os nosos compatriotas falecían por mor da covid".

O PP cre que Ábalos "é a primeira ficha, pero non é a última"

O PP acusou o PSOE de pedir a dimisión de José Luis Ábalos para usalo de "cortalumes" do caso Koldo, unha trama que "salpica" máis dirixentes socialistas: "É a primeira ficha, pero non é a última".

En conferencia de prensa, o portavoz do PP, Borja Sémper, tras a reunión do Comité de Dirección, mostrou reticencias á comisión de investigación no Congreso dos Deputados proposta polo PSOE, xa que, na súa opinión, a presidenta da cámara, Francina Armengol, "está supostamente implicada" na trama, á vez que anunciou que o PP promoverá unha investigación no Senado.

O PP puxo o foco nos ministerios e comunidades autónomas gobernadas polo PSOE que compraron material sanitario coa empresa de Koldo García e sinalou directamente o presidente do Goberno, Pedro Sánchez, ao que acusou de coñecer este suposto caso de corrupción e ao que pedirá que compareza nesa comisión de investigación xunto a dirixentes como Salvador Illa, Francina Armengol, Ángel Víctor Torres ou Óscar Puente.

"A trama afunde as súas raíces en Ferraz, en Moncloa e en ministerios", afirmou Sémper.

Alfonso Rueda di que o PSOE non pode pechar o caso Koldo coa dimisión de Ábalos, e que debe dar máis explicacións.

Sumar apoia que PSOE investigue no Congreso o caso Koldo: "Hai que chegar ao final"

Sumar apoia a comisión de investigación que o PSOE vai rexistrar no Congreso sobre o suposto cobro de comisións na compra de máscaras durante a pandemia polo que fose asesor de José Luis Ábalos, pero non se mete en se o exministro debe deixar ou non o seu escano porque iso "compételle ao PSOE".

Así o puxo de relevo o portavoz de Sumar, Ernest Urtasun, nunha conferencia de prensa no Espazo Rastro, onde cualificou de "desprezable" que alguén se lucrara de maneira ilegal coa compra de material sanitario durante a pandemia e pediu "chegar ata o final" no caso do exasesor de Ábalos, Koldo García, e outros que involucrasen outras administracións, como quere tamén o PSOE.

Referiuse desta maneira á causa que implicou o irmán da presidenta madrileña Isabel Díaz Ayuso, que finalmente arquivou a Fiscalía Europea.

"Sempre fomos proactivos en dirimir responsabilidades e en pedir explicacións. Fómolo na Asemblea de Madrid e o seremos no Congreso", subliñou Urtasun, recalcando que iso é o que esperan os cidadáns.

En Sumar, engadiu, a cidadanía atopará unha forza política que esixirá chegar ata o final. "Fomos implacables coa corrupción", reiterou.