O Ourense C. F. salva un punto na estrea ligueira diante do Athlétic B
O filial bilbaíno foi superior e tivo máis ocasións pero Álvaro Ratón estivo moi inspirado baixo os paus
Salvou un empate o Ourense Club de Fútbol na estrea ligueira diante do filial do Athlétic (0-0). O equipo bilbaíno foi mellor pero non tivo acerto diante da portería dun Álvaro Ratón moi inspirado.
O encontro comezou mal para os ourensáns coa lesión do central Adri Pérez. Un remate de Jerín abriu fogo pero o Athlétic estivo máis preto do gol cun remate de Duñabeitia e outro de Íker Varela.
No segundo tempo o equipo visitante continuou acumulando méritos, sobre todo nos últimos dez minutos. Un remate de Ibai Sanz foi detido entre Ratón e o poste e no último minuto do engadido Monreal, completamente só na área pequena rematou demasiado alto.
