O Iemen irrompe na guerra de Irán tras un mes de conflito

Un mísil lanzado na madrugada deste sábado contra Israel, segundo o Exército hebreo, fai entrar o Iemen na escena do conflito en Oriente Próximo.

Ocorre horas despois de que os hutís, que controlan gran parte da república arábiga, ameazaran con pasar á ofensiva para apoiar a Irán.

Xusto cando se cumpre un mes do inicio da guerra, o presidente dos EUA asegura sentirse "moi decepcionado" cos países da Alianza Atlántica.

O magnate republicano critica a falla de apoio da OTAN nas operacións conxuntas de Washington e Tel Aviv contra Teherán. 

Trump insiste en estar a conversar coa República islámica agora que os obxectivos de ambas as dúas potencias atacantes están máis distantes ca nunca.

Iemen súmase ao conflito

Israel detectou un mísil lanzado cara ao seu territorio desde o Iemen, segundo aseguran as Forzas de Defensa hebreas. Sería o primeiro no marco do conflito recente.

Horas antes os hutís, aliados de Irán, ameazaran con involucrarse na guerra no caso de que os EUA e Israel recibisen novos apoios ou se usase o mar Roxo para atacar Irán.

O portavoz militar do grupo insurxente, Yahya Sarea, asegurou teren "as mans no gatillo". 

Durante a guerra en Gaza, lanzaron máis de 1.800 ataques contra Israel en apoio a Palestina, de acordo coas súas propias cifras.

O "estreito de Trump"

Neste contexto, o presidente dos Estados Unidos criticou duramente a participación da Organización do Tratado do Atlántico Norte no conflito.

Declarou sentirse "moi decepcionado" porque Arabia Saudita e outros dos seus "aliados" na zona, como Kuwait, Qatar, Barhein e os Emiratos Árabes Unidos, fixeron "máis" nesta guerra que a OTAN.

Durante a súa intervención, o líder republicano, a quen lle gusta rebautizar lugares xeográficos, cambioulle o nome ao estreito de Ormuz.

"Estamos a negociar agora (con Irán) e sería xenial se puidésemos facer algo, pero teñen que abrilo. Teñen que abrir o estreito de Trump, quero dicir, de Ormuz. Descúlpenme, síntoo moito, que erro tan terrible".

Trump insistiu en estar en conversas coa República islámica na liña do enviado especial dos EUA para o Oriente Próximo, Steve Witkoff, que anunciara reunións con Irán para "esta semana".

Feridos estadounidenses

No Golfo Pérsico, polo menos doce militares dos EUA quedaron feridos nun ataque este venres contra unha base aérea en Arabia Saudita, segundo informan varios medios estadounidenses, que tamén reportaron danos en aeronaves do Pentágono.

Pola súa banda, Barhein interceptou varios ataques con mísiles e drons lanzados desde Irán ao igual que os Emiratos Árabes Unidos. En ambos os dous países provocaron incendios nos que varias persoas quedaron feridas.

Ataques Irán

A central nuclear iraniana de Bushehr foi branco dun terceiro ataque dos EUA e Israel, malia as condenas do Organismo Internacional de Enerxía Atómica (OIEA).

Así e todo, as investigacións preliminares indican que o bombardeo non causou nin vítimas nin danos materiais ou técnicos na planta.

Ademais, unha nova vaga de ataques xudeus golpeou varios puntos de Teherán e un edificio residencial en Zanjan, no noroeste do país, onde faleceron polo menos cinco persoas segundo a axencia Fars.

Ataques Israel

Irán tamén lanzou novos ataques contra Israel, a maioría interceptados, aínda que no centro do país impactaron proxectís e mesmo provocaron a morte dun home.

Ata o momento, en Israel morreron 19 persoas por mísiles iranianos e proxectís de Hezbollah, alén de catro mulleres que faleceron no territorio palestino de Cisxordania por un mísil de acio iraniano.