O Hondius entra no porto de Granadilla e prepárase para desembarcar a pasaxe
As 14 persoas españolas a bordo son asintomáticas e gardarán corentena no Hospital Gómez Ulla de Madrid
O barco continuará viaxe cara aos Países Baixos co corpo dunha das persoas falecidas polo gromo de hantavirus
O dispositivo prolongarase ata o luns cando parta o último avión con parte da pasaxe de orixe australiana
O transatlántico quedou fondeado ás 6:30 horas. REUTERS/Hannah McKay
O buque de cruceiro MV Hondius, no que se rexistrou un gromo de hantavirus, entrou sobre as seis da mañá deste domingo, hora canaria, no dique do peirao de Granadilla de Abona, en Tenerife.
Aquí vai permanecer fondeado ata que desembarque toda a pasaxe. Arestora, ninguén a bordo presenta síntomas da enfermidade que polo momento provocou a morte de tres persoas. Unha delas segue no barco e vai continuar viaxe ata os Países Baixos.
A embarcación chegou precedida dunha lancha dos prácticos do porto, a Almáciga P, e seguido dun remolcador, o VB-Canarias, que axudaron nas manobras de entrada e fondeo, segundo puido comprobar EFE.
Xa coa luz do sol, comezou a despregadura do operativo para o desembarco da pasaxe e o seu traslado ao aeroporto Tenerife sur, a dez quilómetros de distancia.
O cruceiro MV Hondius no porto de Granadilla. REUTERS/Hannah McKay
Primeiros en desembarcar
Os primeiros en baixar, segundo confirmou este domingo a ministra de Sanidade, Mónica García, serán os 13 viaxeiros e o membro da tripulación de nacionalidade española, ademais dun médico da Organización Mundial da Saúde.
Un avión militar agarda na pista de aterraxe da teminal tinerfeña para trasladalos a Madrid, onde farán unha corentena no Hospital Gómez Ulla. Despois, o desembarco da pasaxe farase por nacionalidades e en grupos de cinco persoas.
En declaración á prensa no porto de Granadilla, a titular de Sanidade asegurou que o fondeo foi un éxito "malia todas as adversidade" e as "oposicións" do Executivo autonómico.
Xente a bordo con máscaras de protección. REUTERS/Hannah McKay
Sen síntomas
A ministra explicou que membros de Sanidade Exterior subiron ás 7:30 horas para avaliar, xunto ao persoal experto que está no barco, o estado de saúde de xeito individual.
"O que nos transmiten é que toda a pasaxe segue asintomática".
Do mesmo xeito, aportou máis datos sobre os traslados. Despois da engalaxe do voo español, dixo que partirá outro cara aos Países Baixos con persoas de Alemaña, Bélxica, Grecia e parte da tripulación.
Logo repatriaranse cidadáns do Canadá, Turquía, Francia, Gran Bretaña, Irlanda e os Estados Unidos. O último avión sairá este luns das Canarias con xente de Australia.
A Garda Civil nun momento do operativo. REUTERS/Hannah McKayT
Oposición de Clavijo
A prolongación do dispositivo ata o luns suscitou o rexeitamento do Goberno das Canarias porque, de acordo co seu presidente, Fernando Clavijo, o acordo eran doce horas.
Ante a súa negativa a permitir o fondeo, a Dirección Xeral da Mariña Mercante tivo que emitir unha resolución para ordenar a súa entrada no dique do porto.
A prensa segue de preto o desembarco. REUTERS/Hannah McKay
A chegada do transatlántico espertou unha grande expectación e son numerosos os medios de comunicación nacionais e internacionais que se desprazaron ata Tenerife para informar dun operativo sen precedentes.
No barco viaxaban inicialmente un total de 149 persoas de 23 nacionalidades distintas, 88 turistas e 61 membros da tripulación. A OMS elevou a cinco os casos confirmados do gromo.
