O Goberno autoriza as obras de rehabilitación do firme na A-6 na provincia de Lugo
A actuación será en 60,4 quilómetros da autovía entre os concellos do Corgo e Guitiriz en sentido A Coruña
O Consello de Ministros autorizou a licitación do contrato de obras para a rehabilitación estrutural do firme en 60,4 quilómetros da A-6 sentido A Coruña, na provincia de Lugo. O valor estimado do contrato ascende a 30,1 millóns de euros (IVE non incluído).
Segundo informou o Goberno central, a actuación levarase a cabo entre os quilómetros 480 e 540,44 da calzada dereita da autovía entre os municipios do Corgo e Guitiriz, atravesando a provincia de Lugo.
O obxectivo é mellorar o estado actual do pavimento mediante a rehabilitación estrutural do firme e a renovación das súas características superficiais. Desta forma, incrementarase a durabilidade da infraestrutura e optimizaranse as condicións de circulación.
