O Deportivo perde en Elda a ocasión de engancharse á zona alta (2-0)
Os coruñeses tiveron boas ocasións na primeira metade, pero desfixéronse na continuación
Un gol de penalti de Masca e outro de Javi Llabrés decidiron o choque en 8 minutos
Os coruñeses quedan a sete puntos do cadro alacantino, que marca o descenso
O ilusionante Deportivo das últimas xornadas deu paso á decepción máis absoluta no partido ante o Eldense. Un encontro chave para definir obxectivos que acabou co triunfo dos locais por dous a cero. Un segundo tempo desastroso condenou os de Gilsanz.
Na primeira metade a posesión foi claramente dos coruñeses, con algunha opción ante a portería contraria por parte de Yeremay. O Eldense agardaba atrás e non concedía espazos. Espazos que si que atopou nalgunha contra. Víctor García estivo preto de inaugurar o marcador. Salvou Helton Leite no man a man. A mellor opción para o Deportivo chegou tras a enésima incursión de Obrador pola banda esquerda. Boa xogada do lateral e oportunidade para Yeremay. A resposta dos de Oltra chegou nunha das súas situacións favoritas en ataque. Un saque de banda, dificultades para despexar e potente disparo de Javi Llabrés que obtivo a gran resposta de Helton. O gardameta deportivista evitaba, xusto antes do descanso, o primeiro gol.
Tras o paso polos vestiarios mantívose o equilibrio. Ata que chegaron os intres decisivos do choque. Zakaria, cun gran disparo, rozou o gol no minuto 55. Pero o que debería ser o impulso para o resto do encontro quedou en nada, porque pouco despois, no 58, o árbitro indicaba penalti nunha acción entre Pablo Vázquez e Masca. Protestaron os deportivistas. De nada serviu, e o propio Masca transformaba a pena máxima.
O peor foi a sensación de impotencia do conxunto galego. Con máis de media hora por diante non deu sinais de vida en ataque. E menos aínda cando o Eldense logrou o segundo gol no minuto 65. Unha contra culminada por Javi Llabrés sentenciaba o encontro. Máis que polo resultado, polas sensacións. Algo que se confirmou no moito que quedaba por diante. Nin rastro dos futbolistas diferenciais do Deportivo. Un remate desviado de Barbero foi a única aproximación de certo perigo.
Moi pouco para un equipo que comezaba a ilusionar. O Eldense, que non gañaba na casa desde novembro, lograba os tres puntos con certa suficiencia.
