O Consello de Seguridade da ONU aborda a operación dos EUA en Venezuela

O Consello de Seguridade da ONU vaise reunir de urxencia o vindeiro luns tras o ataque aéreo dos  EUA contra Venezuela este sábado e a captura do presidente venezolano, Nicolás Maduro, e da súa esposa, a deputada Cilia Flores.

Colombia foi a impulsora da convocatoria da xuntanza e a proposta foi apoiada oficialmente por Rusia e a China, membros permanentes do Consello de Seguridade. A presidencia rotatoria do Consello, que este mes de xaneiro corresponde a Somalia, aprobou a convocatoria.

A reunión será este luns ás 10:00 hora de Nova York (15:00 GMT), segundo o programa oficial de reunións do Consello de Seguridade da ONU. A xuntanza está catalogada como unha discusión sobre ameazas á paz e a seguridade internacionais (Threats to international peace and security).

O propio Goberno venezolano solicitara unha reunión do Consello de Seguridade tras os ataques, que afectaron a infraestruturas civís e militares e cobraron a vida de persoas na capital e os estados próximos da Guaira, Miranda e Aragua, aínda que non precisou máis detalles respecto diso.

"Esta é unha guerra colonial cuxo obxectivo é destruír a nosa forma de goberno republicana, elixida libremente polo noso pobo, e impoñer un goberno monicreque que permita o saqueo dos nosos recursos naturais, incluídas as maiores reservas de petróleo do mundo", escribiu o embaixador de Venezuela ante a ONU, Samuel Moncada, ao Consello de Seguridade da ONU este sábado.

Desde Nacións Unidas, un portavoz do secretario xeral da ONU, António Guterres, e desde un artigo na web da ONU, aseguran que a acción militar constitúe "un precedente perigoso".

O presidente dos Estados Unidos, Donald Trump, confirmou este sábado que o seu país levou a cabo "con éxito un ataque a grande escala" en chan venezolano e que Maduro e Flores foron "capturados e sacados do país".

Posteriormente, Maduro descendeu esposado do avión militar Boeing 757 que o trasladou a Nova York no medio do amplo operativo de custodia que o acompaña.

Ao mandatario venezolano levárono á Base da Garda Nacional Aérea de Stewart, un aeroporto militar no norte de Nova York, onde decenas de axentes de distintas axencias federais, como o FBI ou a Administración de Control de Drogas (DEA) o estaban esperando.

O secretario xeral da ONU, António Guterres, asegurou que está profundamente alarmado pola recente escalada en Venezuela, o que podería ter "preocupantes implicacións para a rexión".

Guterres dixo que os acontecementos constitúen "un precedente perigoso", subliñou "a importancia do pleno respecto —por parte de todos— do dereito internacional, incluída a Carta das Nacións Unidas" e pediu ás partes "establecer un diálogo inclusivo, con pleno respecto aos dereitos humanos e ao Estado de dereito".

El Secretario General @antonioguterres expresó profunda alarma por la escalada en Venezuela, que culminó hoy con una acción militar de Estados Unidos.

Le preocupa que no se haya respetado el derecho internacional.

Hace un llamado a todos los actores en Venezuela a entablar un… https://t.co/btRZVPs2zc

— Naciones Unidas (@ONU_es) January 3, 2026

Paz e Seguridade

O Consello de Seguridade, segundo explica a web da ONU, "ten a responsabilidade primordial de manter a paz e a seguridade internacionais. O Consello de Seguridade ten 15 membros e cada membro ten un voto. De acordo coa Carta, todos os membros da ONU conveñen en aceptar e cumprir as decisións do Consello de Seguridade. Este é o único órgano da ONU cuxas decisións os Estados membros, conforme á Carta, están obrigados a cumprir.

Cando se lle presenta unha controversia, a primeira medida do Consello é xeralmente recomendar ás partes que cheguen a un acordo por medios pacíficos. Pode impoñer embargos ou sancións económicas, ou autorizar o uso da forza para facer cumprir os mandatos."

Este mes de xaneiro o Consello de Seguridade da ONU está presidido por Somalia, en febreiro por Gran Bretaña e en marzo polos Estados Unidos. Seguiranlle Bahrain, a China, Colombia, República Democrática do Congo, Dinamarca, Francia, Grecia, Letonia e, por último en decembro de 2026, Liberia.