O Comité Nacional do PSdeG reunirase o 10 de xaneiro para abordar as denuncias por acoso

A executiva do PSdeG convocou para o próximo 10 de xaneiro, en Santiago, o Comité Nacional, o máximo órgano de decisión do partido entre congresos, para abordar a situación política, nun contexto marcado pola crise interna xurdida das denuncias de acoso contra o presidente da Deputación de Lugo, José Tomé, e o alcalde de Barbadás, Xosé Carlos Valcárcel, ademais de contra a rexedora da Coruña, Inés Rey, por suposto acoso laboral.

Así o acordaron nunha reunión celebrada este luns na sede da rúa do Pino, en Santiago de Compostela. Segundo trasladaron os socialistas nun comunicado, este comité marcará o inicio do ano político da organización e pretende servir tamén para definir un calendario de accións para as eleccións municipais de 2027.

En todo caso, un dos asuntos que se abordarán será a análise das denuncias por presunto acoso sexual e laboral que transcenderon nos últimos días, así como as actuacións e decisións adoptadas polo partido desde que se tivo coñecemento dos feitos.

Neste contexto, a dirección do PSdeG subliñou que considera necesario tratar esta cuestión no máximo órgano entre congresos, "con toda a información dispoñible e desde o respecto aos procedementos internos e ás garantías que deben rexer en situacións desta natureza", engadiu, "poñendo sempre no centro a protección das vítimas".

Por último, os socialistas galegos explican que, unha vez celebrado o Comité Nacional Extraordinario, o partido informará dos acordos que se adopten.