Rey, sobre as denuncias de acoso de dúas exconcelleiras: "Son absolutamente falsas"

A alcaldesa da Coruña, Inés Rey, afirmou que son "absolutamente falsas" as denuncias por acoso laboral efectuadas contra ela, pola canle interna do PSOE, e contra o portavoz do goberno local, José Manuel Lage Tuñas, e ratificou a súa intención de seguir á fronte da Alcaldía. "Teño a conciencia moi tranquila", precisou ante os medios de comunicación.

E é que en relación a estas denuncias de dúas exconcelleiras socialistas, a rexedora insistiu, en liña co comunicado emitido este xoves tras coñecerse as mesmas, que, "non hai acoso laboral nin de ningún tipo fronte a ninguén". "A canle é de denuncias anónimas, pero estas non o son", precisou. "Unha preséntaa unha compañeira que foi concelleira no meu goberno e á que apartei hai máis de cinco anos, retireille as competencias que en virtude da lei lle delegara, e a outra é do primeiro goberno e que non repetiu nas listas electorais".

"Mentres desempeñaron as súas funcións como concelleiras non tiveron nada que dicir", apostilou, para incidir en que "por desgraza, hai persoas así na o ámbito público e privado, xente sen escrúpulos que o único que buscan é o seu propio interese", expuxo.

Ademais, trasladou a súa "absoluta repulsa ao uso dunha canle pensada para denunciar casos de acoso sexual para persoas que non poden defenderse e non para un axuste de contas". "Que é o que estamos a ver agora", reiterou.

Neste sentido, considerou que hai "un uso espurio dunha canle interna para que se canalicen os axustes de contas, o resentimento, a pelexa orgánica". "Dáme moita vergoña, laméntoo pola imaxe que dan", engadiu para insistir en que está "absolutamente tranquila".

Tamén dixo que o seu compromiso co socialismo e o feminismo é "inquebrantable". "Poden facer todas as manobras que queiran, a mentira ten as patas moi curtas e o seu percorrido é ningún", dixo. "Vou seguir defendendo o que creo, alzando a voz con responsabilidade", aseverou para asegurar que seguirá á fronte do cargo e coa confianza de poder revalidalo en 2027.

Así mesmo, indicou que non vai dedicarlle "nin medio minuto a esta xente". "Teño a conciencia moi tranquila, non vou ir a ningún sitio, é todo unha falsidade que non ten nin pés nin cabeza", recalcou.

En concreto, dúas exedís do Concello da Coruña, Eva Martínez e Esther Fontán, denunciaron por suposto acoso laboral a alcaldesa e o seu número dous no consistorio herculino, o responsable de Facenda, José Manuel Lage, mediante a canle interna do PSOE. Unhas denuncias ás que respondeu a través dun comunicado remitido aos medios a propia rexedora, que asegurou que se trata dun "axuste de contas" por non repetir nas listas.

Unha das denunciantes, a que foi tamén secretaria local do PSOE coruñés, Eva Martínez, confirmou a acusación, presentada a través da canle interna antiacoso do PSOE sobre uns feitos que relata que ocorreron no ano 2020.

O PSdeG insta a non instrumentalizar a canle antiacoso

O portavoz da Executiva do PSdeG, Julio Torrado, apelou a "non instrumentalizar" a canle antiacoso habilitado polo Partido Socialista e mostrouse convencido de que a alcaldesa da Coruña, Inés Rey, gañará as eleccións en 2027.

O dirixente socialista pronunciouse deste xeito na sede autonómica do partido, un día despois de que transcendesen as denuncias das exconcelleiras. Torrado asegurou que a dirección do PSdeG non ten constancia neste momento da denuncia presentada por esta ferramenta e diferenciou este caso do que afecta o rexedor de Barbadás, Xosé Carlos Valcárcel, que foi denunciado por unha edil por suposto acoso laboral despois de que ela mesma sufrira supostamente acoso sexual por outro concelleiro, que dimitiu en 2024.

Sobre este asunto, ademais, fontes do PSdeG lembraron que, no primeiro dos casos que saltou, a denuncia por suposto acoso sexual contra o que era presidente da Deputación de Lugo, José Tomé, a dirección do PSdeG tivo constancia a través da confirmación de Ferraz. No segundo, o que afecta o rexedor de Barbadás, a propia vítima acudiu á dirección provincial do partido, ademais de poñer en coñecemento da canle antiacoso os feitos; mentres que neste caso, inciden, no partido en Galicia aínda non foi informado.

O BNG: "Isto ten que ver cunha guerra interna no PSOE galego e coruñés, e iso é grave"

O portavoz do BNG, Francisco Jorquera, indicou que, "sen restar a mínima importancia aos feitos que se denuncian", nestes casos "non estamos a falar de acoso sexual nin laboral". Así, explicou que son "rifas, malos modos e presunta fustrigación entre cargos electos, entre concelleiros, membros do mesmo Goberno" e "non xefes e persoal subordinado".

Nunha rolda de prensa este venres, lembrou que isto que se denuncia "xa foi publicado hai anos por un medio dixital" e tratouse nunha sesión plenaria "sen que naquel momento estas persoas que denuncian o confirmaran e permaneceron nos seus cargos"."Isto ten que ver cunha guerra interna no PSOE galego e coruñés, e iso é grave", opinou.

De todos os xeitos, Jorquera apuntou que "de ser certas as denuncias, son feitos lamentables porque en todos os ámbitos da vida as persoas merecen respecto".