Nove galegos no Barco Dragón español que logrou dous bronces nos Xogos Mundiais

Estrea oficial e dous bronces. A colleita do Barco Dragón español, debutante nos Xogos Mundiais da China, loce como o ouro. Dous bronces forxados pada a pada na distancia de dous mil metros por doce deportistas, dos que nove eran galegos. España só quedou por detrás das grandes potencias orientais.

Tan orgulloso volveu o grupo de padexeiros galegos, sete deles pertencentes ao club Rías Baixas de Boiro, como inconformista. O seguinte obxectivo: pelexar por todo o ano que vén no mundial do Canadá.