Nove empresarios españois, atrapados en Libia entre o fogo cruzado das milicias
Agardan nun hotel para poder saír do país
A embaixada española mantén contacto co grupo e prestará asistencia para a súa evacuación
Un grupo de cidadáns españois permanece atrapado en Trípoli debido aos enfrontamentos entre milicias. Entre eles atópanse nove empresarios que viaxaran co apoio da Cámara de Comercio de Tarragona e que actualmente están refuxiados nun hotel da capital.
Segundo fontes do Ministerio, a Embaixada española mantén contacto co grupo e prevé reunirse con eles tan pronto como as condicións de seguridade o permitan. Exteriores comprometeuse a facilitarlles a saída do país se así o desexan.
A través da súa páxina web, Exteriores lembra que, malia unha certa estabilización tras o alto o fogo, os combates entre grupos armados seguen a ser frecuentes en gran parte do territorio. Esta violencia afecta tanto á poboación local como aos estranxeiros e non se espera unha mellora inmediata.
O Ministerio de Asuntos Exteriores advertiu este martes do “risco extremo” que supón viaxar a Libia e recomendou evitar desprazamentos a este país, incluída a súa capital, Trípoli. A situación de inestabilidade, marcada pola presenza de milicias e grupos armados, segue a ser grave malia o alto o fogo de 2020.
