No Día Mundial do Lupus reclaman dar visibilidade á discapacidade orgánica que provoca esta doenza
En Galicia estímase que hai máis de 5.600 persoas diagnosticadas de lupus e na súa maioría son mulleres
Segundo unha enquisa da Federación Mundial de Lupus, tres de cada catro enfermos presentan unha media de tres órganos afectados pola doenza
Nuria Carballeda foi diagnosticada de lupus hai case 30 anos. Unha dor nas articulacións e unhas ronchas na cara foron os primeiros síntomas. "Cando me diagnosticaron díxeronme Nuria tes unha enfermidade crónica, vas ter que vivir toda a vida con ela, non vas poder tomar o sol de novo e non vas poder ter fillos. Nese momento con 18 anos o que máis che doe é non poder volver á praia, pero 10 anos despois, xusto con 28, eu tiña a miña filla".
Agora ela preside a Asociación Galega de Lupus, unha enfermidade do sistema inmunitario que pode afectar a calquera órgano. No caso de Nuria estivo nunha cadeira de rodas durante un ano por problemas no aparato locomotor. "A verdade é que temos bastantes complicacións por problemas de articulacións, inflamacións, problemas para camiñar. E isto é algo que neste momento precisamos bastante que se teña en conta", explica.
Por iso no Día Mundial do Lupus desde a asociación lanzan unha campaña co cancelo PodemosCoLupus co que queren visibilizar que malia o grande impacto que ten nas súas vidas "somos persoas normais e correntes. Aínda que temos que levar unha vida con algunha característica especial, pero non deixa de ser unha vida normal. Queremos que se quiten clichés e que se nos facilite a vida administrativamente e laboralmente e se faga realidade a inclusión", engade Nuria.
Reclaman, amais, avances en tratamentos e na atención con unidades médicas multidisciplinares e que se inclúan de novo os fotoprotectores no sistema sanitario público porque para as persoas enfermas forman parte do seu tratamento diario.
