Cargas policiais, identificacións e recorte na etapa entre Poio e Mos da Volta a España

A décimo sexta etapa da Volta a España, que se disputa este martes entre Poio e Mos Castro de Herville, foi neutralizada a 8 km de meta polas protestas que se están producindo nas inmediacións da meta.

As protestas propalestinas contra a participación do equipo Israel-Premier Tech na Volta ciclista a España derivaron en cargas policiais e identificacións de varias persoas no final de etapa previsto no Castro de Herville, en Mos, que tivo que ser movido a oito quilómetros de meta.

Axentes da Garda Civil e Policía Nacional tiveron que intervir debido á protesta das numerosas persoas que se concentraban no alto de San Cosme e impedían o paso da comitiva da Volta, o que provocou que se vivisen momentos de tensión entre as forzas de seguridade e os manifestantes.

Fontes da Delegación do Goberno trasladaron que non se produciron detencións, a pesar de que varios dos manifestantes propalestinos foron identificados polos axentes.

A 15 km de meta, momento no que marchan escapados o español Mikel Landa e o colombiano Egan Bernal, a organización da Volta enviou unha comunicación pola súa emisora anunciando tal medida. Informan por Radio Vuelta:

"Debido a unha protesta que está a bloquear a carreira, o gañador de etapa e os tempos para a clasificación xeral decidiranse a 8 quilómetros para a liña de meta". Por tanto, hoxe si que vai haber gañador de etapa.

Anteriormente as forzas de seguridade  retiraron unha árbore atravesada na estrada no ascenso ao alto da Groba.

Javier Guillén: "Mañá sairá a Volta e o propósito é chegar a Madrid "

Javier Guillén, director da Volta, asegurou tras os incidentes polas manifestacións propalestinas que obrigaron a neutralizar a etapa deste martes que a rolda española "sairá mañá" para a disputa da xornada entre O Barco de Valdeorras e Alto do Morredero e que o seu propósito é "traballar para chegar ata Madrid".

"Quero expresar o noso rexeitamento ao que vivimos hoxe, unha vez máis, pois ao longo desta volta xa é a segunda vez. A mensaxe principal que quero dar é que nós imos continuar facendo a volta e mañá imos dar a saída de etapa", dixo Guillén.

Guillén, quen admitiu a dureza da Volta no plano organizativo, remitiuse ao cumprimento das normas.

"Está a ser unha volta moi dura, moi intensa e na que se xerou un extraordinario debate ao que nunca quixemos entrar. Nós temos unhas normas, esas normas témolas que cumprir", subliñou.

Segundo Guillén, esas normas "téñenas que cumprir todos porque non se poden cortar as etapas, non se pode bloquear, cortar o paso aos ciclistas é ilegal porque o tipifica o Código penal e a lei do deporte".

"É algo terrible o que está a ocorrer e por suposto que o que queremos todos é a paz. Logo cada un ten os seus ámbitos nos que poder desenvolverse. Nós queremos defender o noso deporte, defender a nosa carreira e por iso queremos seguir traballando", sinalou.

Rueda critica que haxa protestas que “poñen en risco” a seguridade de ciclistas e do público

O presidente da Xunta, Alfonso Rueda, cargou contra as protestas que puxeron “en risco” a seguridade dos ciclistas e do público ao seu paso por Galicia.

Sobre o particular, o presidente galego, nunha mensaxe na rede social X, subliñou que as protestas “son lexítimas cando son pacíficas” pero “non cando poñen en risco a seguridade dos ciclistas e do público”.

“Galicia non é violenta e esta non é a imaxe que queremos dar do noso pobo”, gabia no comentario.

O BNG celebra a gran mobilización

O Bloque Nacionalista Galego celebrou a mobilización social nas protestas propalestinas que obrigaron a acurtar o final de etapa da Volta ciclista a España.

"Orgullo dun pobo galego e dun nacionalismo popular profundamente internacionalista e solidario. Hoxe a solidariedade galega con Palestina conseguiu deter a Volta oito quilómetros antes da meta", publicou o deputado do BNG no Congreso, Néstor Rego.

Rego acompaña a publicación con varias imaxes onde pode verse unha importante concentración de persoas portando bandeiras palestinas e insignias independentistas galegas na zona do final de etapa rodeadas dun amplo despregamento de forzas de seguridade.