Neda queda seca e obriga a un enganche de urxencia
Os técnicos traballan nunha conexión co encoro das Forcadas para poder atender a demanda de auga
As zonas altas da vila levan días sen auga nas billas
Moitos veciños teñen que botar man dun camión cisterna para abastecerse
Pasou de desbordar en 2023 a vivir a peor seca da súa historia. O río Belelle volve ser protagonista en Neda, pero esta vez, por deixar os veciños sen gota de auga. Baixa practicamente seco. O seu caudal xa non dá para abastecer a planta de tratamento.
Consecuencia directa: a presión da rede caeu por completo. Nas zonas altas, as billas están mudas desde hai días. Situación límite que obriga a baixar coa garrafa á rúa. Un camión converteuse no auténtico anxo da garda de centos de familias. Dependen del para todo.
Mentres tanto, prohibición absoluta: nin regar nin encher piscinas. Os técnicos afánanse en aplicar parches. O último: un enganche rápido para traer auga desde o encoro das Forcadas Urxencia dobre porque as empresas locais comezaron a tirar da rede pública. O consumo dispárase.
E en tempo de crises, reflexión do alcalde: cómpre coidar as traídas dos mananciais e os pozos particulares. Toda axuda é pouca para frear a emerxencia. Neda mira ao ceo, agardando unha chuvia que os mapas, por agora, non contemplan.
