Narbona di que non coñecía en absoluto que Leire Díez organizase unha trama

A presidenta do PSOE Cristina Nabona declarou este mércores como testemuña no caso Leire e asegurou que non tiña o menor coñecemento da suposta trama que presuntamente lideraba a exmilitante socialista Leire Díez para dinamitar causas xudiciais que afectan ao Goberno ou á contorna de Pedro Sánchez.

"Eu non coñecía en absoluto que Leire puidese presuntamente estar a organizar unha trama dentro do partido", reiterou en declaracións aos xornalistas tras comparecer durante media hora ante o xuíz da Audiencia Nacional Santiago Pedraz.

Narbona así o afirmou, segundo ela mesma expuxo, ao preguntarlle o xuíz polas mensaxes que intercambiou con Leire Díez o 24 abril de 2024, cando Pedro Sánchez publicou a carta á cidadanía por mor de que se lle abrise unha causa á súa muller Begoña Gómez por tráfico de influencias, que recolle a UCO da Garda Civil nun dos seus informes.

Nesas mensaxes, Díez fálalle a Narbona de reconducir os ataques ao presidente, dar axuda cualificada e dar a volta ao asunto como un calcetín.

A presidenta do PSOE respondeulle: "Iso contáchesllo a Santos (Cerdán) o outro día".

Acerca desta afirmación, a presidenta do PSOE resaltou que non tiña coñecemento de que Leire Díez estivese a organizar dentro do partido unha suposta trama co obxecto de boicotear causas xudiciais que afectan a Pedro Sánchez ou ao Goberno.

Ao xuíz Pedraz, Cristina Narbona tamén lle dixo que ve indicios preocupantes na actuación de Leire Díez.

Narbona relatou que coñecía a Leire Díez desde 2017, cando a exmilitante estaba no PSOE de Cantabria, e que se viu con ela algunhas veces, sobre todo, naqueles primeiros anos, e matizou que é unha coñecida, non amiga.

Na súa declaración ante Pedraz, segundo indicaron a EFE fontes xurídicas, indicou que tiveron máis trato en 2020, cando Díez estaba en Enusa e se puxo en contacto con ela para asesoramento de imaxe desa empresa pública.

En canto ás mensaxes que intercambiaron cando Sánchez anunciou os cinco días de reflexión na súa carta á cidadanía, manifestou que cando Leire Díez contactou con ela, remitiuna a Santos Cerdán e despois este comunicoulle que o falado era intranscendente e nada relevante.

Tamén declararon como testemuñas dous fiscais. Admitiron que se reuniran con Leire Díez e co avogado Jacobo Teijelo. E que, tras eses encontros, informaran ao fiscal xeral, Álvaro García Ortiz.