Montero, de "accidente laboral" a "falecemento en acto de servizo"

A ausencia de ministros nese funeral é tan só unha das polémicas que rodea a esta traxedia. A outra, as palabra da candidata do PSOE á Junta de Andalucía no debate en televisión en que tachou as mortes de accidente laboral. Horas despois rectificou. Non é o mesmo accidente laboral que morte en acto de servizo.

Sen dicilo expresamente, a candidata á presidencia da Junta de Andalucía, María Jesús Montero, recoñeceu que errou o pasado luns no debate electoral de Canal Sur Televisión cando utilizou a primeira expresión (accidente laboral) para referirse á morte de dous gardas civís que perseguían unha narcolancha na costa de Huelva.

Este mércores, a exvicepresidenta do Goberno admitiu que non ten "nin opinión, nin criterio, nin coñecemento" para cualificar esas mortes como sinistro laboral e cualificounas como "morte en acto de servizo", unha descrición coa que sen dúbida busca minorar o efecto que as súas palabras do luns puidesen ter nas urnas e acougar tamén aos numerosos colectivos -sobre todo no interior do Instituto Armado- que sexa queixaron de forma ostensible.

Desde Jupol tachan esta rectificación de "recollida de cable histórica" e atribúeno a que "non lle debeu saír como agardaban e finalmente convertéronse nun escándalo por esas afirmacións tan lamentables". 

O fiscal xefe de Huelva, Alfredo Flores advertiu que o crecemento do narcotráfico na provincia non é unha simple percepción cidadá, senón unha realidade apoiada polos datos. Segundo explicou, tanto o volume de droga intervida como o número de detencións experimentaron "un salto cualitativo moi preocupante" nos últimos sete anos.

Flores sinalou que o narcotráfico actual "non ten nada que ver" co dos anos noventa ou principios dos 2000. A entrada da cocaína nas rutas tradicionais do haxix provocou que as organizacións criminais adopten medidas de seguridade moito máis agresivas e sofisticadas, incluíndo o uso de armas de guerra cun enorme potencial lesivo.

O fiscal defendeu o traballo das forzas e corpos de seguridade do Estado, ás que definiu como "o primeiro chanzo" na loita contra estas redes. "O crime sempre vai por diante; do que se trata é de que esa dianteira sexa a mínima", afirmou. Na súa opinión, as organizacións criminais parten con vantaxe porque carecen de límites legais e contan cunha gran capacidade económica.

Flores reclama investimento para o sistema xudicial para evitar o colapso dos xulgados e acelerar os procedementos. Advertiu de que algúns procesos poden atrasarse cinco ou seis anos, o que mesmo pode derivar en reducións de condena por dilacións indebidas. "Iso xera unha sensación de frustración", recoñeceu.

A vicesecretaria de Rexeneración Institucional do PP, Cuca Gamarra, afeoulle ao Goberno "a súa falla de sensibilidade absoluta e un abandono dos Corpos e Forzas de Seguridade do Estado. Xa vai sendo hora de que comecen a protexelos como merecen, concluíu.

Os implicados na loita contra o narcotráfico no estreito esixen máis medios e o PP, máis protección para os axentes. Mentres, a investigación avanza. Estase a elaborar o atestado final do sinistro e comeza a inspección das dúas patrulleiras implicadas. 

A Garda Nacional Portuguesa está a colaborar coa Garda Civil na localización dos narcos implicados. Sospéitase que puideron escapar dirección Portugal para evitar o dispositivo de vixilancia posto en marcha na costa española.