Miles de agricultores bloquean cos seus tractores as rúas de Bruxelas contra os recortes da PAC

Miles de agricultores de toda a Unión Europea protestan este xoves en Bruxelas contra os recortes da Política Agrícola Común (PAC). Nas mobilizacións participan 500 profesionais españois, que tomarán cos seus tractores as rúas da capital. As mobilizacións coinciden co cume europeo.

Os manifestantes empezaron a chegar á capital belga o mércores pola noite, e desde primeira hora deste xoves bloquean algúns dos accesos por estrada á capital, provocando unha conxestión de tráfico en boa parte da cidade.

Ás doce do mediodía está convocada unha manifestación que atravesará as principais rúas da capital ata as 15:30 horas.

Aínda que os líderes da Unión non teñen previsto falar sobre a situación do campo europeo, os agricultores decidiron mobilizarse aproveitando que no cumio debaten o próximo orzamento plurianual, que prevé menos fondos para a PAC no período 2028-2034.

Ademais, os mandatarios poderían abordar o acordo de asociación entre a Unión Europea e o Mercosur (O Brasil, A Arxentina, O Uruguai e Paraguai), que en principio se  asinará o sábado en Iguazú (O Brasil). Tanto Francia como Italia son reticentes, polo que as negociacións continúan contra o reloxo en Bruxelas.

Uns 500 agricultores españois participarán nestas protestas que coinciden coa celebración do cumio europeo

Espérase que máis de 8.000 persoas e uns 500 tractores se concentren nos arredores da estación do norte en Bruxelas a última hora da mañá deste xoves para saír desde aí cara ao barrio europeo.

Tras desfilar polas rúas do centro da cidade, o cortexo chegará ata a praza de Luxemburgo, xunto á sede da Eurocámara, onde os representantes das preto de corenta organizacións agrícolas que asistirán a manifestación pronunciarán distintos discursos.

Na protesta participan medio millar de agriculores españois. Os responsables de Asaja, Coag e UPA aseguran que a mobilización responde á "presión enorme" á que están sometidos os agricultores e as cooperativas agrícolas europeas.

Pídenlle a Bruxelas "resultados e solucións tanxibles" para as explotacións agrícolas

Con esta mobilización esíxenlle á UE que actúe "agora" se non quere "perder un dos seus maiores activos estratéxicos: a capacidade de alimentarse a si mesma e ao mundo", indicaron nun manifesto conxunto as grandes asociacións agrícolas europeas.

Os produtores acusan á Comisión Europea de non responder "con feitos" ás súas palabras sobre a importancia estratéxica da agricultura e reclaman "resultados e solucións tanxibles" para as explotacións agrícolas e cooperativas.

En particular, instan á UE para tomar medidas en relación con "tres esixencias" e avisan de que toda acción que non responda nese sentido "considerarase unha mera cortina de fume".

Nos últimos anos os representantes do campo europeo organizaron distintas protestas a grande escala en Bruxelas e nos Estados membros polas distintas crises que atravesou o sector, que aínda considera insuficientes as medidas adoptadas ata a data a nivel europeo e teme ademais agora o impacto dos recortes previstos no futuro orzamento.