Miles de agricultores bloquean Bruxelas contra os recortes da PAC e o acordo co Mercosur, que se atrasa a xaneiro

Varios miles de agricultores chegados de distintos países europeos bloquearon desde primeira hora deste xoves o centro de Bruxelas con centos de tractores para protestar contra o acordo comercial entre a Unión Europea e Mercosur e advertir do impacto que poderían ter os recortes previstos na Política Agraria Común (PAC).

A última hora da xornada, a presidenta da Comisión Europea, Ursula von der Leyen, comunicaba aos xefes de Estado e de Goberno reunidos en Bruxelas que a firma do acordo de libre comercio entre a UE e Mercosur finalmente non se asinará este sábado, senón que foi aprazado ao próximo mes de xaneiro, polo bloqueo de Francia e Italia.

Von der Leyen e o presidente do Consello Europeo, António Costa, recibiron a representantes do sector agrícola, no medio das protestas.

Segundo fontes europeas, a atmosfera da reunión que os líderes comunitarios mantiveron con COPA-COGECA -dúas organizacións que representan a asociacións de agricultores e cooperativas a nivel europeo- foi positiva e produtiva.

Nunha mensaxe publicada nos seus respectivos perfís dunha rede social, Costa e Von der Leyen dixeron que a UE brindará a súa "confianza e apoio" ao sector da agricultura, especialmente nestes "tempos de incerteza".

"Cun apoio firme e sostido no orzamento da UE, axuda específica para pequenas explotacións agrícolas, explotacións familiares e novas agricultores, e simplificación para facilitar a vida diaria dos agricultores", aseguraron os representantes europeos.

Uns 8.000 manifestantes

Os organizadores das protestas falaron dunha asistencia duns 8.000 manifestantes, con preto de 500 tractores para bloquear accesos á cidade e ao barrio europeo, onde se está celebrando un cumio de líderes da UE.

Tras as primeiras horas de marcha e o impacto no tráfico e transporte público da cidade, os primeiros altercados rexistráronse pasado o mediodía, cando os manifestantes chegaron ao barrio europeo e a Policía fixo uso de gases lacrimóxenos e canóns de auga.

Os axentes disolveron a manifestación tras numerosos ataques a edificios nas inmediacións do Parlamento Europeo e violentos enfrontamentos entre policía e asistentes que se saldaron cun ferido grave. O home sufriu unha lesión grave na cabeza e tivo que recibir atención médica. Non se sabe se era un manifestante ou un xornalista.

A policía acordoou o Parlamento Europeo. Os traballadores foron trasladados a un edificio máis seguro e afastado das protestas. A comisión Europea pediu aos seus funcionarios que evitasen a praza de Luxemburgo e pediulles que  non levasen a súa acreditación á vista.

A mobilización, na que se calcula que participaron 500 agricultores españois, ten como eixo central a defensa dunha PAC con orzamento propio, unha estrutura baseada en dous piares e un carácter verdadeiramente común, fronte á proposta do novo Marco Financeiro Plurianual 2028-2034, que expón un fondo único e que, segundo o sector, pon en risco os ingresos agrarios, a cohesión territorial e a soberanía alimentaria da UE.

A marcha coincidiu coa celebración tamén en Bruxelas dun cumio de xefes de Estado e de Goberno da Unión, unha cita que precisamente arrincou con atraso porque os presidentes da Comisión Europea, Ursula von der leyen, e o presidente do Consello Europeo, António Costa, mantiveron un encontro con representantes de COPA-COGECA, a organización que agrupa a agricultores e cooperativas agrarias na capital comunitaria.

Un diálogo "bo e produtivo", tal e como subliñaron ambos os mandatarios nunha mensaxe conxunta publicada nas súas respectivas redes sociais, tras un encontro que fontes europeas describiron como con "boa atmosfera" e que se alongou preto de 45 minutos.

"En tempos de incerteza, os nosos agricultores necesitan seguridade e apoio, e Europa sempre estará ao seu lado, cun apoio sólido e sostido no orzamento da UE, axudas específicas para as pequenas e as explotacións familiares, así como para os novos agricultores, e medidas de simplificación que faciliten o día a día do sector", recalcaron Costa e Von der Leyen.

Aínda que o acordo con Mercosur non figura formalmente na orde do día do cume deste xoves, fontes europeas sinalan que os líderes poderían abordar o estado das negociacións do pacto con Brasil, Arxentina, Uruguai e Paraguai, cuxa firma se esperaba para este sábado, nas marxes dun cume de Mercosur, pero quedou no aire tras pedir Francia e Italia o seu aprazamento.

Rueda pide que se manteñan os fondos para garantir a produtividade do sector primario galego

O presidente da Xunta, Alfonso Rueda, defendeu este xoves a necesidade de que Bruxelas manteña os actuais fondos europeos para o sector primario e garantir así a súa competitividade.

Durante o acto de entrega dos premios Exceleite en Santiago, o xefe do Goberno galego insistiu na mensaxe que mandou a semana pasada na capital comunitaria de que é preciso que a pesca e a agricultura sigan recibindo fondo específicos como ata agora nos próximos orzmentos que está elaborando a Comisión para o periodo 2028-2034.

Alfonso Rueda afirmou que os fondos para o sector primario "nin poden diminuir nin decidirse en despachos por xente que nunca estivo cerca dos gandeiros nin das granxas".

Presenza galega

"Si queren guerra, van ter guerra" asegura Paco Bello, presidente de Asaga. Os agricultores rebélanse contra a nova Política Agraria Común, que prepara un recorte do 22 por cento no presuposto. Son 900 millóns anuais menos para España. E iso, denuncian os agricultores, mentres se incrementa o gasto noutros ámbitos como o militar.

Roberto García, secretario xeral de Unións Agrarias sinala que "pretenden unha política que deixe de ser común porque vai depender de cada país"A nova PAC está no punto de mira, pero tamén o acordo co Mercosur que apoia España. A súa chegada a Bruxelas para participar na reunión de lideres da Unión Europea dixo que "Europa debe abrirse a estes acordos comerciais".

 

Unha opinión co que non coinciden os agricultores. Países como Francia ou Italia móstranse reticentes a este acordo co Mercosur, que aínda debe recibir o visto e prace do Consello e do Parlamento Europeo.