Mario Regueira descóbrenos dúas novidades de Galaxia

'Unha historia de nós', de Pablo Diego Dios, nace coa intención de divulgar algunhas das historias menos coñecidas da nosa terra. De certo, figuras como Diego Xelmírez e Pardo de Cela son ben lembrados por todo o mundo, pero se cadra non tanto Exeria (considerada a primeira escritora galega da historia) ou o viquingo Ulf, pirata e mercenario, que foi coñecido como O Lobo Galego. É unha boa oportunidade de refrescar esa historia, ás veces menos popular.

'Un mar de curiosidades', de Javier García Galdo, pola súa parte, é o gran libro de curiosidades do mar. Imos mencionar dúas marabillas das moitas das que nos fala: ondas cadradas e o marabilloso narval, o unicornio das bestas mariñas, considerado lendario durante moito tempo.

Da bioloxía á historia e á cultura, non hai moitos campos que García Galdo deixe sen tocar, contándonos desde o que significan as tatuaxes mariñeiras ata episodios como a Batalla de Rande, que ben poderían aparecer tamén no outro libro que traemos.