Maduro e a súa muller decláranse non culpables de torturas

 O deposto presidente venezolano Nicolás Maduro e a súa esposa, Cilia Flores, declaráronse este xoves non culpables dos novos cargos de conspiración para cometer torturas que lles imputou a Fiscalía dos Estados Unidos.

Maduro e Flores compareceron ante o xuíz federal Alvin Hellerstein no Tribunal do Distrito Sur de Nova York unha semana despois de que a Fiscalía os acusase de conspiración para cometer torturas e estendese a ambos os dous o cargo de conspiración para cometer narcoterrorismo, que ata agora só pesaba contra o deposto líder.

Preguntado polo xuíz, Maduro declarouse non culpable e asegurou que a acusación está baseada en «falsas acusacións e testemuño contra a súa persoa». Segundo dixo, trátase dunha «suma de elementos e ataques que xa coñecía no pasado».

Flores, pola súa banda, foi máis comedida e limitouse a declararse «completamente inocente» e «non culpable» dos novos cargos.

Ambos afirmaron ante o xuíz que os seus avogados os informaran da nova acusación e que recibiran unha copia dela en español.

Esta foi unha das poucas veces que se puido escoitar falar a ambos desde que fosen presentados ante a xustiza estadounidense o pasado mes de xaneiro, tras seren secuestrados en Caracas e trasladados a Nova York.

Tras a súa declaración, a audiencia centrouse no calendario que se vai seguir.

O xuíz aprazou ata o 14 de xuño de 2027 o inicio do xuízo e non está previsto que se celebre outra audiencia ata o mes de decembro.

A última audiencia antes de que comece o xuízo terá lugar o próximo 7 de xuño.

A defensa solicitou dispoñer de máis tempo para poder preparar a súa resposta á nova acusación da Fiscalía estadounidense.

Tras a nova acusación, Maduro e Flores están imputados por conspiración para cometer narcoterrorismo, conspiración para importar cocaína aos Estados Unidos, posesión e conspiración para posuír armas destrutivas, ademais de conspiración para cometer torturas.