Luis Suárez manda o Racing á Primeira Federación
Coa derrota no campo do Almería (2-1), con dous goles do máximo goleador da categoría, o cadro ferrolán confirma o seu descenso
O Racing certificou o seu descenso á Primeira Federación logo de perder por 2-1 no campo do Almería. Un dobrete do dianteiro colombiano Luis Suárez, que xa leva 25 goles, resultou fatal para os intereses do cadro galego, que baixa á falta de cinco xornadas para o final da competición.
O Almería xogaba a posibilidade de entrar na promoción de ascenso, pero non foi mellor que o Racing. De feito, as mellores oportunidades do partido foron para o equipo de Ferrol. No primeiro tempo, Naldo tivo unha moi clara no 35 para adiantar o seu equipo. O central brasileiro perdoou en ataque e estivo moi desacertado en defensa ao cometer un penalti claro que aproveitou Luís Suárez no minuto 43.
No segundo tempo puido marcar o empate Álvaro Giménez despois dun centro de Héber, o mellor do partido. Tamén fallou o dianteiro e na seguinte xogada (minuto 52) Luis Suárez volveu amosarse letal diante da portería.
O Racing levou o peso do partido e seguiu xerando oportunidades, pero volveu demostrar a razón pola que é o equipo menos goleador do campionato e pola que asina o descenso cando aínda quedan quince puntos en xogo. Só conseguiu marcar na última xogada do partido, na que Álvaro Giménez remachou un lanzamento de Raúl Blanco.
